殺入香港嘅索尼3D iDTV要戴住立體眼鏡先睇到立體效果，否則畫面會鬼影幢幢。
3D電視機殺埋身啦，Sony後日（8號）會喺銅鑼灣同尖沙嘴Sony Style專門店設3D電視體驗區，擺放剛剛喺美國CES國際消費電子展展示嘅全高清3D LED iDTV，畀巿民體驗3D威力。小藍早幾日試睇真係睇到嘩嘩聲。
家用產品及營銷巿務本部巿場經理Benny話，部機52吋，內置3D發射器，配合主動式快門眼鏡立體眼鏡。部機除咗對應3D訊源，即使係普通2D訊源，都可以提升到3D立體畫面。佢播放2D足球片段，㩒一㩒遙控變成3D效果，畫面即時變得好立體，波來波往好似射埋嚟。畫面又冇因為動作快而出現殘影。
今年內各大品牌晒冷
Benny笑笑口話，同本身以3D技術拍攝嘅電影比較，仲有一段距離。佢馬上播放一段3D片段，係一頭北極熊喺水族館游水，小藍睇到眼前嗰部52吋電視機，變咗一個真實嘅魚缸，魚缸入面一頭北極熊游水。Sony 3D iDTV大約在夏季推出發售。影音專家Alan Lee都有去CES觀摩唔同品牌嘅3D電視機如樂聲牌、三星、東芝等，實力好平均，LG仲有埋3D投影機㖭。Alan話，3D電視係大勢所趨，今年內各大品牌會大晒冷，消費者可以慢慢選擇。
from:
http://hk.apple.nextmedia ... art_id=13703184
