[其他] 改名改人望改運

「衫可以唔洗、股票要日日睇」、「衫可以遲啲洗、股票要即時睇」，呢兩句廣告對白播到街知巷聞，正係近期好了傷疤忘了痛嘅師奶寫照。做一隻小小資訊報價機，原來一樣可以好出位，只要夠噱頭就有市場。

上世紀八十年代大哥大電話尚未流行之前，傳呼機大行其道，當時嘅星光傳訊好威。星光傳訊創辦人黃金富於2000年入主中華發展（1051），易名星光數碼，其後相繼改名為星光生物科技、信用卡防盜，但無論點改名，一樣年年蝕到喊。其後再改名為智富能源，卻未改蝕本宿命。

簡單啲講，1051呢個冧巴，自2000年以來蝕足9年，改名無助改運。股齡較深嘅股民，都會記得黃金富予人一個發明家形象，並唔見佢響市場cap到好多水，後來間公司換咗位專教人買殼借殼嘅博士揸旗，亦唔見得有好大起色，最起碼班賓架唔Buy，點改名都係徒然。

不過，Every stock has its day，睇睇個市點樣喪炒就知，只要冧巴仍在，業績最衰嘅股票都可以突然鯉魚翻身，甚至再發揮其爆炸力。公司剛斥資2.21億美元，收購原本由澳洲上市礦業公司Oz Minerals擁有，位於印尼蘇門答臘之Martabe金銀礦項目95%權益，項目包括勘探、興建及採礦權，已獲澳洲外商投資審查委員會通過。

金價持續高企，有國際估值公司為項目出具報告證明，單是Martabe金銀礦蘊藏量達222萬盎斯黃金及2971萬盎斯白銀。故事講到呢度，表面上似乎無異於其他股壇變色龍，但係公司委任嘅行政總裁兼副主席及執董Owen L.Hegarty才是萬有引力所在，佢就係Oz Minerals前身Oxiana Limited的創辦人，擁有35年礦業相關經驗（金礦呢科真係少啲經驗都會失手），成功帶領集團由1千萬澳元市值躍升至60億澳元。

Owen自己出錢出力投資3千萬美元入股智富，3年禁售期，每股認購價不低於0.35元，持股佔重組後之4.8%。另外公司搵大摩配售130億股集資額45.5億港元，大摩接呢單生意，似乎係睇好呢位業內猛人。有高人入股入局，照計唔似搭個雞棚咁簡單，公司將改名為「國際資源集團」，希望今次改名可以改埋運，真係可以成功轉型。