推出半年仍然金身未破，無法用ISO 玩老翻嘅PSP 3000 機，雖然為正道打勝一仗，但卻令主機銷情大跌，遊戲店冇啖好食。
近排電機兒就收到風，話九龍區某大場有鋪頭用邪道手法，力推聲稱已經90%完成破解嘅PSP 3000 機，老點新手玩家入貨，幾時都話，玩老翻就預咗要俾人坤，何苦呢又？
藍色神電
有傳出咗粒3000 機都用到嘅Lite Blue 藍色神電，連著名科技網頁Engadget 都有講。搵番呢粒電嘅所謂官網，佢由08 年11 月已經吹水會出，但到家都未見影，流嘅！
YouTube 片洗腦
喺呢條YouTube 片內，部3000 機真係改咗做自製firmware ，但黑店冇講其實仲未可以由Memory Stick 度讀game ，老點啲客就快有老翻ISO 。
老點「即將」玩老翻
3000 機玩唔到ISO 之後，銷情已經跌咗3 、4 成，更慘係仍然迫唔到人買原裝game ，反而搞到部玩到ISO 嘅2000 舊款機由原價$1,380 炒到去$2,600 。
近排有黑客送片上YouTube ，證明可以將部3000 機改到行自製firmware （其實仲未玩到老翻game ），黑店為咗推3000 機畀客，即場用netbook 、iPhone 播條片畀客睇，講到3000 機已經改到8 成，遲吓自己喺屋企都可以DIY ；再兇佢家唔買下個月就升價，唔少心急用家見平都落叠。
有人在網上踢爆，3000 機改到嘅消息只係game 鋪為推機而發放嘅流料。
上討論區睇吓啦，根本人人都話你知3000 機係改唔到，連全球最出名嘅破解PSP 黑客Dark Alex 都宣布投降。
旺角行人區某連鎖店直情貼張通告，話3000 機玩唔到老翻，叫你唔好發夢。
回收舊機 再搵水魚
呢個呃人局仲未完噃，假設有水魚落叠買3000 機，到佢玩咗個零月仍然未改到機，就好有可能將部機賣返出去，黑店A 就會夾埋自己另一間分店B （鋪名當然唔一樣啦！），將外殼勁新嘅3000 機送去翻新當全新機再賣，用相同手法再坤下一個水魚，搵多次錢。
有乜方法避免？根本打PSP 就唔應該玩老翻，其實旺角、黃金大部分game 鋪都好老實，絕少賣3000 鬼機，再怕嘅咪去連鎖店或者Sony Style 買，寧加錢食多隻垃圾game 當買個安心。
$1,500 連4GB 咭賣出，保護貼機套又賺你$80 。
$650 全套回收，B 鋪賺$100 差價。
$50 人工清潔翻新
邪道開心直航流程表
A 鋪︰客人玩完去B 鋪放機
B 鋪︰將二手機送去C 鋪翻新
C 鋪︰送去A 鋪當新機賣
其實A 、B 、C 鋪都係同一個集團經營，由$1,580 賣新機，回收後再扮新賣出去，減番翻新人工，可以大賺$750 ，好執過賣新機好多！
估計利潤︰$1,580- 翻新機成本$800- 配件成本$30 ＝賺$750
呢隻《高達戰場之絆》因為冇老翻，推出頭一個月炒到$460 ，但隻game 需要4 碟4 打先好玩，冇乜正版人支持下，滯銷之下已經跌返落$348 。
4 月1 日有人上Uwants 論壇吹水話《戰場》已hack ，原來係Fool's day joke ，俾人鏟到上天台！討論區都刪除埋，只可以在google 見到record 。
《高達戰場之絆》劈絕老翻
其實Sony 唔止喺3000 機上落防老翻工夫，近期BANDAI 兩隻PSP 大作《idolM@ster SP 日月星》、《高達戰場之絆》都特別喺UMD 碟內建專用firmware，想玩game 就一定要update 做5.05 版本，改咗機就ISO 同原裝都玩唔到。
有正道game 鋪就利用呢點，話就快所有game 都冇老翻，力勸玩家乖乖玩正版。雖然都係做生意賺人錢嘅伎倆，但導人向善的確值得讚揚。
