客家炆豬肉：客家傳統小菜，加入豆卜、木茸等作配菜，並以柴火炆，入口稔滑。$55
近日天氣開始回暖，最岩timing 活動就梗係行山，不過一般行山路線想搵好嘢食超難，唔係啃背囊自備麵包，就係去中途站爛鬼士多食餐蛋麵，就算沿途個景幾靚都好，行到又
又餓先揸車去搵食絕對唔過癮！
所以今期〈食玩一程〉就推介車主一條真正有得行、有得睇、有得食，仲要有得探險的無敵遠足路線，一次過睇盡新界東北印洲塘一帶靚view ，去埋歎三椏村正宗客家菜，玩足1 日，所費無幾又健康。
烏蛟騰盡頭有約20 個停車位，假日去讀者想安心泊車就要早嘅出發。
三椏涌一帶屬於濕地，路邊有不少紅樹矗立，有豐富自然生態。
沿海山路可以一次過睇盡全個印洲塘海岸公園靚view ，景觀開揚。
今次行山路線全長約17 公里，起步點由烏蛟騰出發經九
租、上苗田、下苗田、三椏涌至三椏村，之後沿三椏村到本地有名的荔枝窩再上鎖羅盆，最後沿榕樹凹、谷埔回鹿頸，以成年人正常步速行最少都要8 粒鐘，想跟足全程行，最好就預早將部車泊在鹿頸發記士多前公共停車場，再沿馬路邊行約15分鐘至烏蛟騰起步，咁行完山
到死都可以即刻嗱車走人。冇咁好腳骨力的車友亦可行至荔枝窩的一段，原路折返，雖然總共都要行成16 公里，但路面靚腳程快又唔太辛苦，而且泊車地點更方便，只需揸車沿新娘潭路右轉至烏蛟騰新屋村盡頭公共停車場即可，全程只需約4 個半鐘。
合益蜂場老闆曾先生一家現居住在三椏村祖屋，有數十年落廚經驗的他廚藝一流。
鹹雞：以粗鹽醃過夜，鹹味岩岩好，新鮮黃油雞仍可保留鮮味，有得4 至5 人必食。半隻$70 、全隻$140
由烏蛟騰至三椏村一段溪澗，有唔少如廣東彈塗魚及螯蟹等濕地生物。
濕地靚view （烏蛟騰至三椏村）
【5.75 公里、需時約1 小時30 分】
今次行山路程唔短，建議讀者最好出發前帶定水及乾糧，在烏蛟騰停車場盡頭位左邊便會有九
租指示牌，沿指示直入約5 分鐘路程便到，九
租現為荒廢村落，村內已經冇人住，八卦仔大可入屋睇吓環境。再繼續向前行便有上苗田、下苗田、三椏涌及三椏村指示牌，跟足方向行約個半小時就去到三椏村，雖然聽落粒半鐘幾誇，但由上苗田開始沿途風景絕靚，唔只綠樹林蔭，更可睇晒全個印洲塘靚view ，沿途一段段濕地旁紅樹林及小橋溪澗，愈行愈relax ，而且80%都是好行平路，影吓相行一陣好快就到。
三杯鴨：以一杯酒、一杯豉油及一杯醋作主要汁料，再將鴨肉同時炆熟，鴨肉入口味濃，送飯一流。$55
三椏村內有3 間食店，不過有2 間都係士多，得公仔麵等小食，只得這間合益有正宗客家菜食。
歎正宗客家菜（三椏村）
客家菜大家就食得多，但喺真正客家村屋門前歎最正宗客家菜你又試過未？去三椏村食客家菜，個名最響便是合益，讀者去到三椏村十字路口，只需跟荔枝窩指示牌行約3 分鐘便會到。合益的客家菜最勁是味道夠正宗，老闆曾先生是本地原居民，十幾歲已經去荷蘭做廚，到97 年回流香港開過餐館，5 年前退休便全家搬回祖屋做特色客家菜。這里最出名是做法跟足傳統古法炮製，好似鹹雞用3 斤黃油雞先蒸熟再以粗鹽醃過夜，三杯鴨就用紹興酒、醋及秘製豉油炆，而且用料絕對新鮮，連蔬菜都係自家種植，各類海鮮就嚟自附近一帶漁民。
合益蜂場
地址：三椏村老圍
電話：2679 9511
營業時間：10:00-18:00
百花魚藤為本港罕有植物，現時全港只可以在荔枝窩見到。
漁護署特別在魚藤樹林興建步行道，以方便市民參觀。
全港唯一魚藤樹林（三椏村至魚藤樹林）
【2 公里、需時約40 分鐘】
食飽有氣有力先可面對餘下新鮮刺激旅途，由合益蜂場再繼續向荔枝窩方向行約35分鐘就可以去到新界東北面最大規模的荔枝窩客家村，沿途路段易行，兼大部分路面都鋪裝平坦，假日好多一家大細都鍾意嚟，到荔枝窩前必經景點是全港唯一的魚藤樹林，全個樹林都生滿形狀古怪而且粗度達20 至30cm 的百花魚藤，魚藤本身為攀援類植物，專穿插生長在大樹林立的樹林之間，像荔枝窩這樣粗的大魚藤更已經有超過百年樹齡，觀感壯麗，絕對有需要見識見識。
據香港漁護署紀錄，荔枝窩的客家村最少有300 年歷史，而且是全港保持得最完整的村落。
客家村前有小食攤檔，所售賣的特色茶粿更有多款選擇，如紅豆、雞屎藤及鹹茶粿都有，價錢由$4 至$7 不等。
小食攤檔有記最出名是山水豆腐花，既清甜又滑，$7 碗行山友解暑必歎。
最完整客家村（魚藤樹林至客家村）
【0.25 公里、需時約10 分鐘】
離開魚藤樹林，再行約5 分鐘便到荔枝窩客家村，荔枝窩的客家村至今已有300 年歷史，雖然今日已經冇人住，不過入面仍保留正宗客家村的「枕山環水」風水布局，全條村依山而建，村後既有半月形茂密風水林、村前則有禾塘河溪及伯公廟包圍。
每逢星期日或公眾假期，荔枝窩客家村前更會有另一間叫有記的小食攤檔，行到
哋大可整番碗山水豆腐花或地道客家茶粿當甜品，全部小食都由當地客家人自家炮製，最正的客家茶粿更有紅豆及雞屎藤等味道，唔似一般坊間茶粿一味死甜。
有記
地址：荔枝窩廣場大樹下
電話：2674 0172
營業時間：星期日及公眾假期09:00-15:00
由於百花魚藤在大樹中生長，所以形態極有飛躍如龍的觀感。
通心樹通心原因是樹幹中央部分曾受感染，令中央部分萎縮，但就奇蹟地仍能生長。
風水林通心樹（客家村至風水林）
【0.15 公里、需時約3 分鐘】
中國人重視風水學說，客家村山上就有風水林，在小食攤檔跟指示牌步行約5 分鐘便到，顧名思義，風水林就係客家村後面的半月形樹林，入面種滿香港罕有樹種如假蘋婆、銀柴及土沉香等，加上漁護署特別在風水林加設步行道及介紹樹木的資料牌，頗有教育意義。最特別係風水林入口有棵過百年歷史的通心樹，原為秋楓樹，樹高21 米，樹身闊度達1.7 米，樹幹中心部分雖然已壞死，但樹身仍能繼續生長，兼有超過百年樹齡，是本地難得一見的罕有植物。
入鎖羅盆村讀者最好有心理準備，夜晚入去更諗都唔好諗，四圍陰陰森森包保可以嚇死你。
鎖羅盆村前有警告板，表示廢屋隨時有倒塌危機，入面更有如毒蛇及山狗等動物出沒。
鬼村內破屋讀者切記唔可以行入去，因為破屋隨時會倒塌，而且極多蛇蟲鼠蟻。
勁似電影《鬼域》鬼村的鎖羅盆，連幾十年前細路玩的鐵架都有，而且仲要生滿雜草。
靈異鎖羅盆鬼村（荔枝窩至鎖羅盆）
【3.5 公里、需時約2 小時15 分鐘】
如果冇咁好腳骨力建議在此照原路回程，但若愈行愈過癮，咁就可以跟我哋去埋離荔枝窩有3.5 公里路程、有鬼村之稱的鎖羅盆走轉。不過荔枝窩至鎖羅盆要行成2 粒幾鐘，之後仲要再行約5 公里返落鹿頸。而且路段比之前難行2 倍以上，上山位路面全部凹凸不平而且斜度高，冇做開運動絕對有難度。不過鎖羅盆最多探鬼團去玩，講到咁誇就點都想去睇吓。
由風水林再落番小食攤檔位，右手邊便會有鎖羅盆指示牌。鎖羅盆清代又叫「鎖腦盆」，相傳戰時有2 兄弟回村慶祝太平清醮，入村後發覺村屋全部完好無缺，而且屋內日用品全齊，但全部居民卻離奇失蹤，而且用作供奉的祭品卻安然無恙，有傳說是村民被日軍屠殺及發生瘟疫。此外村內更有一「羅盤被鎖」離奇現象，地區的磁場效應令指南針失效。現時村內四周都被大樹遮蔽，所以特別陰森恐怖，村內破落廢屋入面更黑黑漆漆，隨時有倒塌危險，而且附近有野豬、毒蛇出沒，小心腳步，就算唔怕鬼都咪行咁埋嘅屋！探完險，就可由鎖羅盆經榕樹凹及谷埔回鹿頸，路程約需要2 小時，最後落番馬路行15 分鐘返發記士多嗱車就走得。
