食咗幾日蘿蔔糕，油脂滿體內，新年過後工作忙，冇得去球場打波，最少都買隻Wii 體感網球game 《用Wii 玩Mario Tennis 》郁動身體。呢隻game 要全體感去玩，大斜線、上網、底線抽擊，全部要親力親為不斷fing 手掣，打完兩局真係流身汗，燒耗你唔少卡路里。
Data
名稱：《Play Mario Tennis @ Wii 》
類型：運動
人數：1 至4 人
廠商：任天堂
售價：$258 （i-gamer ）
i-gamer （2725 3338 / 深水
福華街福仁商場地面G20 鋪）
正手回擊
反手回擊
曲線下墜
左旋球
右旋球
抽擊
網球嬌娃示範fing 掣
好多人以為呢啲非官方Wii 掣網球拍配件係得個樣，但筆者玩得耐，發現加咗手掣會重咗，揮拍時冇咁易用錯力扭親腰，仲可練力。
六方向體感勁揪
呢隻game 其實係任天堂Game Cube 主機嘅舊作，改成體感操作後再戰江湖。玩家可以照舊用雞髀上的analog 掣移動角色，揮拍就要落力fing 掣先得。佢唔只會計你力水，仲計埋方向，比如將波打向左邊，就要由右至左fing ，打高波就要下至上fing ；如此類推，共有六種變化。
呢隻game 唔可以上網對戰，單機2P 同4P 都係左右分割畫面。衰在如果得兩個掣，2P 就只可以對戰，唔可以合作對電腦。
基本遊戲都係同人/ 電腦對戰，或者打吓盃賽，畫面豐富得意，但真係唔算靚。
油畫練準繩
八爪魚練反應
角色反應 人人唔同
筆者試玩後發現，任天堂真係幾細心，唔同角色的揮拍時間都有差別，比如用全能型嘅瑪利奧，追到最後一刻都仲可以fing 掣打波，但如果用力量型Donky Kong ，因為佢打波手勢慢，起手嘅timing 就要提早少少，唔同角色真係有唔同打法，認真樂趣無窮。
《孖網》有好多怪球場，每個場都有對應嘅mini game 玩，比如要回擊唔同顏色嘅網球，玩填色畫冊，又或者搵巨型八爪魚訓練反擊，真係打到氣咳，好多嘢玩！
超絕必殺球
猩猩打擊同行路都慢，咁仲有乜好用？原來每個角色都有2 招必殺球，而力量型嘅超必自然係更加強勁。想出絕招，只需要不斷回擊對手發球，令上方角色能源bar 儲滿變紅，再按實A 掣揮拍即可。
大鎚手 瑪利奧可以出火球同埋大力鐵鎚抽擊，速度快到對手反擊唔切。
飛吻吸手波 桃公主嘅絕招係飛吻，可以將追唔番嘅波吸埋身邊，初哥啱用。
Model 玩後感：趣過Wii Sports
Model 阿Wing 都係機迷，除咗玩《WOW 》，都幾鍾意開《Wii sports 》出身汗：「估唔到呢隻《孖寶網球》真係可以跟我揮拍角度去擊球，唔係一味盲目fing 掣。」阿Wing 最鍾意對戰：「我覺得2P 雙打賽最趣，兩邊都有個電腦助手，可以幫你補位，冇咁易失手，初哥必試。」
同場加操 直感指上控板《Skate 2 》
！我唔會夾硬到話打滑板game 都可以燒脂，但反正本星期sporty 開，唔爭在玩埋呢隻美、日勁hit 嘅《Skate 2 》。
呢隻game 竟然係「板仔風GTA 」，主角係一個剛出冊嘅小混混，要用踩板比賽去制霸成個城市嘅童黨。佢個基本操作比任何一款滑板game 都直接同易玩，手掣左analog 係轉方向，右邊analog 冬菇呢？你可以當佢係自己踩緊板嘅雙腳，推左右就係flip 板，拉下推上係「起跳」，跳起後打個圈就等如轉塊板。
但筆者覺得呢個操作雖然方便，但如對滑板冇基本認識，好難出到連串華麗花式，如果EA 可以加多個初哥easy 操作，令門檻低一點，就唔怕初學者玩到冇癮。
Data
名稱：《Skate 2 》
類形：運動
人數：1 至4 人
廠商：EA Blackbox
售價：$298 （i-gamer ）
按部就班
初時只可以做簡單招式，耍多幾招之後，左下角能量計會加分，你嘅速度會更快，此時就可以做高難度動作了。
全城狂挑
而家啲game 都流行搞個大地圖畀你四圍搵對手battle 。
自組戰場
你又可以自製場地，正斗在真係會見到玩家個角色響度推長椅、木板，勁真實。
睇網話受傷指數可以去到4 萬幾分，我高空訓落地再加磨薑先得2 萬幾，點樣可以再傷啲？
除咗上網睇人啲片，呢隻game 仲有隻板界明星扮《逃》拍真人短片，食番出冊主題。
推介：Jackass 自殘賽
規規矩矩打1P 故事模式以外，推介mini game 「Hall of Meat 」，玩者要響高台起跳，佢會計你跳幾高、做過乜嘢花式、邊個身體部分著地，計出你身體自殘度，好鬼《Jackass 》，必玩！
又會俾佢影到啲咁嘅受傷場面，有冇咁痛先？
上網頁
http://skate.ea.com，可以直接用電腦製作tee 、滑板圖案，上載後可在遊戲使用。
連線：Share 賤嘢威嘢
其實呢隻game 唔只打機，仲可以畀你自製圖案、拍低玩板過程的短片、相片，放上XBL 任由朋友下載分享。啲衰仔創意無限，上到去見到唔少賤格抵死之作，一定要去𥄫𥄫。
網友玩後感：爛身爛勢夠爽
香港討論區嘅網友yatyatng 由上集已經玩緊呢款板game ，佢讚新一集，多咗好多新動作，連失手時嘅PK 動作，板仔衫破爛、場面損耗都做足。
