減息減得多，市場可以解讀為經濟太差，所以要落重藥。換個情況睇，減息減得少，其實亦可將之詮釋為經濟冇想像中咁曳。人行減息0.27厘，市場似乎唔太滿意，A 股及港股照插可也，內地股市昨日跌幅達半成，港股當然跟隨向下。不過，睇番大市成交，昨日較前日縮減，只有319億元，係06年10月以來最低水平；反映港股近兩日跌勢只係「乾跌」格局，跌市成交小，未必代表大市氣氛好差，可能係長假期臨近，市場人士索性一動不如一靜，早啲放假離場。且看新年元旦假期過後，港股會否回氣再炒「一月效應」？
有貨伺機獲利
今日平安夜，港股半日市，估計市場買賣兩閒。雖然近日大市表現疲軟，不過個別股份走勢仍然強韌，好似中國重汽（3808）在10月下旬至11月初於3元水平築底成功後，股價即穩步上升，昨日逆市升0.04元，收報5.93元。當日低位買貨，目前仍未沽的散戶，可謂食盡這一升浪。不過，重汽技術上已漸見疲態，過去4個交易日受制於6元，而14RSI 升至70的超買水平，隨時見頂回吐，冇貨不宜高追；此外，在低位買到貨的散戶應伺機獲利，並以10日線約5.60元水平作止賺位。方星俠
FROM: 頻果日報
