噚日收到高盛一個講窩輪市場回顧展望嘅邀請電郵，華華第一時間諗起佢哋嘅靚女輪后李頌慈，事關自從高盛11月6日全球大裁員後，當時同華華話「清假」嘅佢一直未有現身。不過今次論壇又再無緣見到輪后，因為講者換上郭強同郭家強，兩位個名勁相似嘅猛男。
上月大裁員日走人
輪后唔經唔覺已經「休假」個幾月，今次再度缺席，令華華好擔心佢嘅去向。之前有報道話李頌慈喺證監會嘅註冊紀錄已經取消，華華即刻上去睇睇，發現佢喺高盛嘅牌照紀錄只係去到11月7日，時間岩岩喺正高盛大裁員之後過日，加上據證監會網頁嘅備註講，輪后已經冇主事人，所以唔可以從事受規管活動，從種種跡象顯示，輪后已經離開咗高盛。李頌慈05年由法興過檔高盛，不過喺金融海嘯拖累下，窩輪成交大幅萎縮，市場盛傳輪后已經被裁，只係高盛同輪后本人一直冇開口證實。
兩繼任人名字相似
講番高盛兩位新話事人，郭強、郭家強又係乜嘢來頭？華華喺證監個網搵到，兩位喺高盛都有一定資歷，郭強係高盛香港證券衍生產品主管，03年加入高盛，之前曾經喺巴克萊證券亞洲做過；而郭家強同樣喺03年加入高盛，兩位仁兄個名咁似，大家又同樣喺03年加入高盛，真蹺！李華華mailto
iWaWa@AppleDaily.com
李頌慈：休息係為咗再衝刺做準備，睇住嚟啦。（設計對白）
FROM: 頻果日報
