唔計吳尊、阿Sa ，你估吓今年動漫節最多人排隊嗱簽名嘅漫畫家係邊個？唔係《花樣男子》、唔係牛佬+玉郎，而係日本輕小說插畫天后——伊東雜音！
唔識伊東雜音？宅男界捧到上天嘅輕小說《涼宮春日》同《灼眼的夏娜》插畫就係出自呢位女插畫師，以當日靠購物滿$80換來的簽名名額只得150個，而合資格人士竟然超額30倍，勁到癲！
其實呢股輕小說熱潮（Light Novel ），早已吹襲港、日、台三地動漫界，而家就話你知，點解愈萌就愈hit ！
讀者Rainbow 排一個鐘都係想快人一步買新一期小說。
人龍迫到針都插唔入，記者都被fans 叫唔好插隊，為咗見到天后，好鬼緊張啊佢哋！
雜音喺漫畫家嚟講算係潮，戴Chanel J12表（$36,000）同Cartier 戒指（約$20,000），難怪fans 排5個鐘都想見佢。
有大量玩家扮演涼宮春日同夏娜，個個都話因為套校服夠靚，人物又出名，所以就想扮。
《涼宮》、《夏娜》期期賣過萬
點為之一本輕小說？當然唔係用個磅check 下本書重唔重啦。
其實唔使想得咁複雜，簡單講就係漫畫出版社食多條水，用動漫迷、遊戲迷喜歡嘅題材去寫小說，好似超大熱作《涼宮春日》系列就係用校園+美少女+奇幻推理為主題，而《灼眼的夏娜》就係一套美少女科幻武打小說。有說係2000年左右，《哈利波特》、《魔戒》等小說大熱，令新一代開始追看小說，於是呢類題材有趣嘅輕小說就應運而生了。
聽出版社角川洲立代言人講，《涼宮》同《夏娜》係佢公司嘅龍頭大作，每一集新推出時喺香港可以賣出10,000本左右，好賣過唔少二打六女星嘅寫真同所謂散文集，真係好勁！
扭橋之王 《涼宮春日》系列
作者成日扭橋，主題同女主角涼宮春日嘅性格一樣咁五時花六時變，一時就係校園生活，一時又會去雪山玩密室殺人，係一套唔太易消化，但角色好出位嘅小說。（作者：宮川流/1至9集發售中，售價由$50至$70/ 角川洲立出版）
刀劍少女 《灼眼的夏娜》系列
「炎髮灼眼的殺手」少女夏娜為了保護身為特殊能力者「密斯提斯」的高中生
井悠二，與敵人紅世使徒展開戰鬥。
（作者：高橋彌七郎/0至12集發售中，售價約$50/ 角川洲立出版）
1
2
3
4
5
6
1到信和一代匯集漫畫度踩場，《涼宮》同《夏娜》果然放喺最當眼位置，店員小菁講，《涼宮》舊年好賣啲，近期因為Animix 收費卡通台播《夏娜》，好多人返嚟追書，成績好好，成日都缺貨。
2呢本伊東雜音插畫集《華焰》，阿菁話啲fans 收到風作者會嚟，未到8月已經冇晒貨。（相中呢本係阿菁私伙。）
3《夏娜》、《涼宮》分別喺04、05年拍成卡通後，個勢就更加一發不可收拾。負責製作《涼宮》的日本京動畫更加一炮而紅。
4在旺角信和的格仔箱，唔難搵到fans 自製的同人誌、精品發售。
5《涼宮》係秋葉原最紅嘅角色之一，圖中係佢推出PS2遊戲時展出的1比1figure 。
6《涼宮》最知名就係被翻版成3級碟《涼宮Hahiru 》，由於製作認真，所有場景跟到足，fans 非但冇抗議，仲有唔少人讚。
萌萌插畫家冇腐味！雜音超Nice 專訪
好多人有誤解，以為畫美少女、同人誌嘅畫家，男就電車，女就係「腐女」（愛睇鹹濕漫畫的干物女），但我覺得伊東雜音就絕對冇腐女味，係普通女仔一個，平時喜歡shopping 、high tea ，玩吓閃石指甲。
做訪問時仲好搞笑好nice ，佢上次去台灣影嘅相全部唔小心delete 晒，提番起仲要勁笑，真人好傻好天真，係衰在怕鏡頭，影相個樣先咁cool ，真人唔係咁㗎！
最愛短裙露底
雜音小姐讀中學時已經好鍾意CLAMP 等同人誌畫家，矢志入行，不過好笑在佢讀完美術專科後，盲舂舂入咗一間鹹game 廠做插畫家。
提到雜音作品，除咗表情靚，最煞食就係靚校服同埋成日露底底，問到佢點解咁鍾意畫啲囡囡露底，佢解釋：「我覺得露底過一瞬間，過種羞澀加埋幾分可愛真係好正。」我就好想佢畫吓書展單UFO 露底事件喇！
希望畫有型男主角
涼宮同夏娜係來自不同小說原作，但咁岩都係個性好強嘅大女人，而男角通常都好冇鬼用，問到老師想唔想畫啲型仔男主角，佢都話：「你咁講我又好想畫吓，不過都要等合適嘅機會先可以去試。」問到佢想畫邊類型嘅型男，佢就話：「我都幾鍾意《Devil May Cry 》入面個主角但丁，想畫吓呢類男人。」
1
2
3
1雜音小姐個blog 唔係咁卡通，反而好美少女，佢平時愛收集小飾物，四圍影四圍玩，細心睇，佢已將香港之行寫在blog 內，update 得咁快，難怪有成580萬訪問人次。
2雜音小姐喜歡玩閃甲，但因為成日要畫稿，所以唔敢玩太複雜嘅立體花紋，仲唔可以留得太長。
3老師同otaku 偶像歌手中川翔子係老死，問到老師佢會唔會同翔玩cosplay ，佢話會扮夏娜，因為娜妹條裙仔夠短夠性感。
4大最紅萌女
正如宮川流話齋，《涼宮春日》嘅成功，好大原因係插畫家伊東雜音嘅人物設計出色，加上小說可以用較多篇幅去描寫角色，令讀者慢慢迷上幾位美少女主角，而引伸出大量玩具迷買figure 、cosplayer 爭住扮。而家嚟睇吓雜音筆下4大天后級萌女！
天然呆—朝比奈實久留
呢位囡囡天生傻吓傻吓，成日俾人恰，加上天使臉孔同魔鬼身材，係近年cosplay 界同AV 鹹片界成日扮嘅角色。
無口女—長門有希
自從《福音戰士EVA 》出咗一個唔出聲嘅凌波麗，無數卡通照抄，日本仔稱之為無口女。長門都係其中一個，佢成日唔出聲，齋睇書，又係大把仔鍾意。
女王—涼宮春日
涼宮春日係一個文武全才嘅美少女，但卻生人忽近，因為佢有種自己都唔知嘅神秘力量，心中所想就會變成現實，加上佢好霸道，成日點到身邊班朋友頭都暈。
傲嬌女—劍士夏娜
黑髮時係一個141cm 高嘅可愛女生，愛食菠蘿包，但當戰鬥時就會引發火焰能力，一頭紅髮，好打又霸道。好多fans 就係鍾意夏娜呢種一時一樣，兼具可愛同威武嘅賣點。
最紅少女公仔Figma
玩具都係輕小說角色不可少的一環，但近年玩具界已經唔多流行幾百蚊1隻嘅首辦完成品式囡囡雕像，取而代之係平價嘅可動公仔。
呢種大約7吋高嘅可動公仔叫Figma ，由於技術進步，所以百幾蚊已經上色勁靚，成身郁得。雖然唔係乜嘢大炒大賣限定版，但勝在平價質優，聽講人氣角色可以賣出10萬隻，相當平民。各約$199（各玩具店有售）
Figma 係由知名雕刻師淺井真紀製作，做乜嘢表情動作都得，佢以前啲作品隻隻都炒過千，而家大量生產，真係惠及市民。
除咗《涼宮》、《夏娜》，佢地嘅同門《幸運星》一樣好hit ，主角泉此方同涼宮春日係用使用同一個配音員，所以成日cosplay 涼宮春日。
連夏娜都會喺11月出Nendoroid 版figure 。（售價未定）
換個嬲樣先！
最Q 的Nendoroid
同期仲有呢種4吋大頭公仔，特色係可以換表情，大大個頭夠可愛。呢隻涼宮，仲有《死亡筆記》嘅L 同奇拿，紅到連大陸廠都要做老翻。$250（各玩具店有售）
Nendoroid 又有2吋高迷你扭蛋版，勝在款式夠多，一輯會有成8款以上，可以自己換手換腳搞crossover ，好似圖中呢對涼宮同此方就交換校服著。（$38/ 抽1隻）
平野綾唱歌好聽，個樣又唔差，出碟曾打入Oricon 十大位置。
配音配到紅
日本仔將配音員當明星去谷，已經唔係新鮮事。配涼宮春日嘅平野綾係近年至hit 的一位，至於配夏娜個位釘宮里惠就更厲害，由於佢配得太多大家姐人物，迷死唔少fans ，日本宅男界就笑呢啲信徒有「釘宮病」，詳情可上Wiki 睇睇。
釘宮個樣唔係靚，不過把聲就紅到BANDAI 要同佢合作出「萌版啪啪紙機」。
宅男最愛「傲嬌」
傲嬌（Tsundere ）即係乜？就係用嚟形容班萌女表面扮惡死，其實內心勁冧你，試想像一個女仔紅住面咁為你送上手製飯盒，口中卻講反話：「你食就食，唔食就罷就。」宅男必冧啦！
