在網上大受歡迎的《C&C 》類型即時戰略遊戲，玩家指揮大局行軍布陣，講智慧講手段，爭在並非落手落腳關槍殺敵，其實即係鬼佬式《孫子兵法》，暴力型gamer 未必啱嘴形。
《Quake Wars 》就針對玩開動作同射擊game 嘅朋友，將第一身射擊遊戲（FPS ）加入這種戰略遊戲中，令玩家可以做士兵射敵人、炸坦克外，又可以做工程師起炮台嚟霸地盤，先做好布防再親身落場喪打，呢種新兵法可以大膽叫做「鬼子兵法」！
名稱：Enemy Territory Quake Wars
類型：FPS
平台：PS3/XBox 360
廠商：Activision
人數：1人（2-16人Online ）
售價：各$439
打仗都要classicfy
如果要理解呢隻遊戲嘅玩法，又可以簡單當做《Rainbow Six 》嘅故事模式，未必一定要殺晒所敵人，但就要響指定時間內，完成所有任務。而佢同《Rainbow Six 》唔同，就係佢可以響途中「轉行」，用唔同身份：工程師、士兵、救護人員等去完成只有某種身份先可以完成嘅特定任務。而且，最特別嘅就係如果做工程師仲可以起炮台、反坦克裝置等，好似加入咗《C&C 》嗰種起嘢霸地盤玩法，對於FPS 遊戲嚟講，都好新鮮。
指定時間任玩
另外，再同一般FPS 唔同，就係佢係「不死」。意思係如果俾人射殺，可以等救護人員嚟救，或者索性控制新加入嘅援兵。所以，可以話係響指定時間內任玩。遊戲嘅勝負就旨在你達唔達成到任務。
致勝關鍵 了解隊員運作
既然講得有唔同職位，梗係有唔同功能，而且某啲任務只可以由某個職位完成，同埋唔同職位仲可以用唔同功能嘅工具。況且點都會有支槍跟身，唔會做救護人員就槍都冇支任人魚肉，熟讀功能都係了解兵法之一。
士兵Soldier
最簡單嘅兵種，戰鬥格，好多時都要佢哋炸爆敵人裝置先可過關。
工程師Engineer
可以修理戰車，重型武器保持戰鬥力，而且可以響自己地盤起對人炮塔及對車炮塔等，防務好有用。
救護人員Medic
可以救俾敵人射傷嘅同伴，亦可以補給自己友生命。
站兵Fied Ops
負責保護陣地，可以放遙控炸彈同起炮台，防守時多用嘅兵種。
哨兵Covert ops
探子工作，避免走入主戰場，專走陰濕路去敵人陣地埋地雷、放雷達。同埋做雷射瞄準敵人重要設施，用大殺傷力武器轟炸。
總結：衰在冇得upgrade
講得似玩《C&C 》其實武器好重要，雖然，佢都有唔少戰車、戰機，而且設計同種類唔少，但衰在除咗兵種可以憑經驗值upgrade 外，其他戰車等都冇得upgrade ，耐玩度唔高。不過，呢個問題，有機會可以用下載內容補充，但要唔要錢就唔知喇。另外，呢類講求合作性，唔同人有唔同職責，最啱online 合作玩。
選擇遊戲模式及關卡都好有PC 即時戰略遊戲feel 。
