天氣妹黃婉曼雖然話自己少著名牌，但佢呢晚攞住既Gucci 手袋，價值6 千蚊。最近無線新聞大改革，但都唔夠天氣報告有noise ，皆因有個晚晚帶我哋跳出香港嘅天氣小姐黃婉曼。2 月份的《晚間新聞》更因為她加入做新天氣妹，平均收視由1月份的15 點升至19 點。其實黃婉曼出身《新聞透視》記者妹，被睇中「過底」報天氣之後即由扒女變索妹，仲因為身材有番咁上下被網友惡搞成低胸天氣妹，跳得更過癮。
據知，黃婉曼私生活一樣精采，同師姐趙海珠一樣暗交新聞部攝影師，同居於男方位於葵涌樓齡近40 年的唐樓單位。攝影男無限艷福，難為宅男激到跳起。
舊式天氣報告個個主持似唸經，悶爆。2 月2 日開始TVB 《晚間新聞》轉新模式，加插全新天氣報告環節，天氣小姐黃婉曼日日帶觀眾跳出香港，跳跳吓跳出彩虹。
天氣妹黃婉曼男友花名大細釗，原因其右眼大過左眼。大細釗出名服侍周到，上週五（20 日）揸住價值11 萬嘅豐田bB 座駕接女友放工，一齊返葵涌愛巢。
前後腳
上星期三（18 日）男友沒有揸車，黃婉曼則乘坐TVB 廠車出旺角，等埋男友（右）收工一齊轉搭小巴，明等男友但又刻意前後腳行，非常小心。
新聞主管投訴
天氣報告一向非新聞部話事，而係由製作開時事節目嘅公共事務部（P.A.）負責，上頭有命改革，就揀中原本主持《新聞透視》，報道手法頗跳脫的黃婉曼。
有幕後人爆料：「公司想天氣時段年青
，睇中黃婉曼因為佢性格活潑，指明要佢搞『㷫』個天氣報告，仲有出鏡費慰勞佢添。」不過黃婉曼紮紮跳反傳統，旋即惹起新聞部不滿：「第一日節目出街，幾乎嚇死新聞部
同事，花仔偉（新聞部主管袁志偉）即刻向P.A.投訴，勒令佢跳少
，黃婉曼即刻跳少咗。」
知情人士還透露，P.A.只係要求天氣時段輕鬆
，黃婉曼即自發功將自己對天氣嘅睇法加入節目中，名句「跳出香港」都係自己諗出嚟，「一出街就好多網友讚，咪繼續囉！」
摸仔竇
兩人搭小巴到達沙田第一城，即曾志釗父母家，但黃婉曼怕被記者發現，撇低男友飛奔入大廈，純熟地輸入密碼開鎖進入，後來黃婉曼解釋：「我上去食飯者，佢屋企好保守，唔畀過夜架。」
谷身材
上週二（17 日）晚上約9 點，黃婉曼同男友一齊到TVB 飯堂撐枱腳，食飽先報天氣；黃婉曼故意將腰帶束緊，身材更明顯，難怪網友大讚她好身材。
曾志釗前女友鄒文妮，兩人拍拖8 年，鄒曾是有線財經資訊台節目《休娛大腳板》及《潮流旗艦店》主持，冇乜人識唔夠黃婉曼紅，去年離開有線轉投網上傳播媒體。
掂cam man
人紅自然有人留意私生活，黃婉曼去年8 月開始跟無線新聞部外勤攝影師曾志釗拍拖不久，男方便搬離與家人同住的沙田第一城，另覓位於葵涌近四十年樓齡的誼發大廈同居。
黃婉曼男友3 年前由有線新聞部過檔TVB ，在行內出名乖仔兼荷包疏爽，對女友呵護備至。有傳黃婉曼吸水力強，使男友錢亦唔客氣，黃婉曼接受本刊訪問時亦唔覺意以「兩公婆」稱呼自己跟男友關係：「公一份婆一份者，佢有時送下禮物仔畀我就有。」（係咪同居？）「唔係，佢住沙田第一城，我嗲地媽咪係深圳住，我咪借佢地方住住先羅。」至於天氣妹男友被問及兩人同居一事，他亦冇否認：「你地都知啦！」
'09 惡搞索女
有網友指她身材好，用電腦加工執走佢件內膽同加深溝，仲將加工照片放上網，黃婉曼就唔太認同：「我唔覺自己靚女，亦唔係行呢的路線，大家都係留意番我報天氣啦。」
'08 矇眼扒女
黃婉曼曾是《新聞透視》主持人，間中幫手做埋《星期二檔案》，她說喜歡以輕鬆的手法探討時事，可能因此被選中做天氣小姐。
黃婉曼報天氣之後，成日彈彈下，有網友就留意到佢靚左索左好多。
扒女大翻身
天氣妹黃婉曼跳到上位，網友更大讚佢樣靚身材正，其實黃婉曼'07 加入TVB 時外表普通，當時主持《新聞透視》個樣認真麻麻，因為當時經常出外景冇專人化妝set 頭，扒樣出晒來；現在入廠前都跟新聞報道員一樣有專人化妝，即時靚晒！黃婉曼說：「有人化妝，服裝就自己搞掂，要自己買或者著舊衫，我咩衫都著，冇乜名牌。」
有傳黃婉曼於內地出生，小時移居香港，後來父親因生意失敗回內地工作，只剩她留港苦讀。黃於香島中學以3A1C 成績考入中大，06 年畢業於新聞與傳播學院。傳聞她原名粘冰冰，大學三年級以「黃婉曼」為筆名寫論文，之後索性做埋藝名，黃婉曼回應話：「咁肉酸個名，私人嘢唔想講。」
專出叻女
前立法會議員周梁淑怡（右）及女作家林燕妮（左）兩位女強人在六十年代從事電視行業做過天氣女郎，係當年女強人的踏腳石。
「悟飯」配音
梁少霞為TVB 天氣報告服務超過10 年，其實她原屬配音組，最為人熟悉是配過日本卡通《龍珠》的童年悟飯。
作曲過界
李煥明跟梁少霞一樣主持六點半時段的天氣報告，樣貌甜美的她96 年至06 年曾作過曲，許志安、李克勤、梁詠琪合唱的〈一言為定〉便出於她手筆。
做歌星
吳咏梅8 年前辭去天氣小姐工作，曾任空中小姐的她得到李煥明介紹打算進軍樂壇，簽約WhoLaLa 成為網絡歌手，唱過國語歌「甜咖啡」，可惜冇知音。
有「錢」途
咪以為做天氣小姐籍籍無名，其實有唔少今時今日的名女人係天氣妹出身，做天氣妹原來好有「錢」途。
