陳秀雯和丈夫林國雄日前被貼大字報追數，陳秀雯胞妹陳加玲前晚被追問此事時，竟狂鬧姐夫林國雄不事生產陀衰家，拿了胞姊千多萬及到處借錢，比偷食的倪震衰格10倍，其姊更慘過周慧敏100倍。不過陳秀雯昨日質疑妹妹因酒後失言亂講說話。
早年債務新聞纏身的陳秀雯及其夫林國雄，日前被人分別在太子道寓所及大埔亞視片廠外張貼「欠債還錢」大字報。陳秀雯胞妹陳加玲前晚在西九龍中天地出席名車BMW 活動，問到其姊和姐夫被追數事件，陳加玲即連珠炮發數臭林國雄足足10分鐘，她說：「我好嬲過個人，嬲咗佢好多年。」
「借咗300萬畀佢」
林國雄與陳秀雯結婚多年來，債務新聞纏身。資料圖片
問陳加玲是否指其姐夫林國雄？她說：「我冇認過呢個姐夫，我自己同我家姐冇嘢，佢嫁咗畀我家姐，搞到我哋屋企冇好過，係人都知佢不事生產，我家姐賺咗千幾萬都畀咗佢。我少見過個人，同佢冇聯絡，佢過時搞地產公司都係我媽咪出錢，佢人格好有問題，佢不事生產，陀累屋企，照顧佢成20幾年，嗱咗我家姐千幾萬，仲周圍借錢，十隻手指借晒，講嘢講到天花龍鳳，一係話俾人呃，我自己都借咗300萬畀佢，之後話畀我聽俾人呃，sorry 都冇句，好似唔關佢事。兩個月後媽咪就肺cancer ，四個月後過咗身，我真係好唔開心。」陳加玲越講越激動，而且提到母親病逝時更邊拭淚邊說：「媽咪臨死時好唔開心，好擔心家姐，做男人做到衰到咁，發生呢啲事超過10年，一句sorry 都冇，我自己借300萬，媽咪過身前又借百幾二百萬，爹哋又有少少，我忍咗佢10幾年，我打電話問佢交代，佢仲大大聲同我講：『你玩我，叫我還錢。』仲同我家姐講唔記得有咁嘅事。呢個人衰格程度比周慧敏過個人（指倪震）嚴重10倍，周慧敏都要分手，佢（指陳秀雯）都要離婚，我會照顧佢，我哋成家都係受害者，林國雄好賤格好唔掂，一個偽君子，之前又話出家，講廢話，返嚟又生個仔，要出就出咗，總之朋友夥計唔熟唔食。我呼籲所有人睇清楚佢嘅真面目。」問陳加玲是否因為周慧敏與倪震事件有感而發，她說：「女仔好蝕底，我家姐慘過佢100倍。」剛為亞視拍攝完《法網群英》的陳秀雯，現與林國雄租住太子道福怡花園，對於陳加玲的言論，陳秀雯昨日在電話中說：「佢講呢啲說話時係咪飲醉，我要了解吓。」問她是否被丈夫花盡多年積蓄，她說：「咁私人嘅嘢，我唔需要同大家分享。」問到夫妻感情及財政是否有問題，陳秀雯拒絕回答，揚言食得飽穿得暖，與陳加玲姊妹情不變。記者昨日致電林國雄，但記者表明身份後他即掛線。
「佢係縮頭烏龜」
陳秀雯與林國雄現租住太子道福怡花園。
對於被陳秀雯質疑酒後失言，陳加玲昨日否認說：「我一滴酒都冇飲過，我唔可以忍受佢傷害我屋企人，佢係縮頭烏龜、絕世魔頭。我當時真係忍唔住大鬧佢，佢垃圾都不如。過去嘅日子一直由家姐擔起頭家，家姐為咗個仔，盲從維護佢，每次佢啲錢散盡，就返嚟搵家姐或者親人借錢。「佢把口真係好氹到人嗱錢，難為家姐有福冇得享，有禍要同佢
，佢仲試過搵家姐簽擔保借錢，又成日用家姐個名借錢，個腦真係生壞咗，我好心痛家姐為咗個咁嘅男人中咗邪咁。」採訪：梁錦雯、比華利攝影：陳順禎、娛樂突發組
娛樂資料庫：落難夫妻債務纏身
陳秀雯與林國雄於麗的藝訓班出身，早於80年合作拍攝劇集《驟雨中的陽光》前已發展地下情，但她選擇在86年、她最當紅時嫁給林國雄，退出娛圈，育有一子。婚後林國雄淡出電視圈，90年更萌出家之念，後改為從事地產工作，陳秀雯出錢出力支持。同年陳秀雯復出，憑《再見亦是老婆》演肥師奶再度走紅。
被僧人騙千萬
80年代陳秀雯與花名叉燒的林國雄，因拍麗的劇集《驟雨中的陽光》而擦出愛火。資料圖片
97年，陳秀雯夫婦聽從一僧人所言，捐出1,000萬到福建興建佛教大學，最後該僧人去如黃鶴。翌年陳秀雯夫婦捲入多宗錢債糾紛，包括丁屋發展爛尾遭索償、又遭地產公司合夥人方國珊入稟索償。有指兩人欠下巨債，更秘密搬屋。其後陳秀雯夫婦又遭財務公司追討300多萬供樓欠款。07年陳秀雯再度復出，在紅館開個唱之餘，更參演亞視劇集《法網群英》，近日她再涉及錢債糾紛，日前遭人在亞視片廠及太子道寓所貼大字報追債。
受害人方國珊：唔想同佢計較
曾主演亞視劇集《哪吒》的方國珊，92年與潘芳芳和陳秀雯合作搞地產生意，最後因財反目，她們的友情也畫上句號。退出幕前的方國珊近年專注發展地產事業，現職西貢區議員，進軍政界。
方國珊當年憑亞視劇集《哪吒》一炮而紅，但早年已退出幕前。
現職西貢區議員的方國珊，近年主力從政。
「合則來不合則去」
陳秀雯胞妹陳加玲前晚大義滅親，力斥姐夫林國雄近年不停欺騙親友錢財，她稱方國珊和潘芳芳當年也是受害者，方國珊昨日在電話中說：「對於林生嘅做法同為人，我唔作評論，亦都唔想同佢計較，時間係最好嘅證明，呢啲舊事不值一提，我而家只係想努力做好議員嘅工作，服務巿民。」談到因財失義，方國珊慨嘆道：「有啲嘢過去就過去，合則來不合則去。」採訪：比華利
陳加玲前晚數臭姐夫林國雄，指他不事生產四圍借錢，越講越激動。
