咁多年我哋都未out ？（設計對白）
呢排咁多online game 出，仲要隻隻都免費任玩，不過就算畫面點靚，裝備點勁都唔及Facebook 嘅《古惑仔Online 》咁爆！個個出門口前都賴死做完任務先肯走，返到公司又掛住搵人開戰，就連平時唔打機嘅同事陳柒都俾呢隻game 撩起鋪打機癮，聽住友情歲月扮浩南！
好多人為咗add 多啲同伴，都會去討論區叫人add 定自己個fb 先，所以筆者最近都add 咗一大堆唔識嘅人。
遊戲內嘅級數、攻擊力甚至防禦力其實冇乜用，打人時反而朋友多先最重要，要兄弟定要黃金？梗係要兄弟啦！
人多好辦事
呢隻fb 版嘅古惑仔玩法同以前嗱正牌過隻完全唔同，唔使周街行打怪練功之餘，亦唔使等人組隊解任務咁麻煩。玩法係只要喺fb 裝咗遊戲application 介面，好似平時睇網頁咁click 下click 下，自己一個hea 住做任務賺錢兼升級，輕輕鬆鬆就玩得，有錢就買裝備買地盤，升到高級就可以打人，好易明。不過，諗住自己等級高就可以去打啲低level 就錯晒！因為呢隻game 最緊要係多人，就算你係10級仲有8個同伴，但對方只要有10個同伴的話，即使level 低過你，都一樣抽贏你！而且每add 多個人都可以增加金錢，或者回復體力同精神，所以人人都勁發邀請出去叫人玩。
竟然有人特登寫外掛搵錢，證明隻game 超受歡迎。結果搞到設計程式班人要發聲明，警告大家一用外掛就會被停止帳號！
咪以為圖中嘅小朋友食住甜筒就好好蝦，人哋已經係龍頭大佬喇！
好多人為咗引人add ，就專登會用靚女相掩人耳目，睇真英雄榜第二名過個靚女，有成2,666個同伴，其實佢叫Gary Cheung ，擺明係仔。
古惑仔谷體力
遊戲入面每升一級就有3點畀你加能力值，當中以體力最重要，甚至可以話只加呢樣就得，因為做任務就一定要靠體力，做完晒啲任務就可以等佢慢慢回復，期間可以做住其他嘢先，上網、去廁所或者食個麵，轉頭回夠體力又可以做任務，唔會浪費時間。而且呢種方法岩晒打工仔，一邊做嘢一邊玩都唔會太影響工作，開個browser 就玩得，就算打緊機都唔會被老闆發現。你想加攻擊力加精神打人當升級？冇話唔得，不過你搵夠朋友拖行馬先算啦！
《Mob Wars 》系統比較完善，而且keep 住有新嘢玩。
鬼佬古惑仔玩得更盡！
其實呢隻《古惑仔Online 》同早前出過嘅《Mob wars 》好似，不過後者系統更加完善，被人打到重傷要入醫院抖一排先可以出番嚟，而且就連江湖追殺令都有，睇邊個唔順超就搵佢出氣都得！上Facebook 搜尋「Mob wars 」就搵到。
Game Review
SIREN:New Translation 絕望式恐怖
經典恐怖冒險遊戲，畫面同音效都極有氣氛，加上主角勁弱雞，見到喪屍死咗9成，而且Dual Shock 手掣遇到恐怖嘢仲會跟住震，有人陪住玩都一樣嚇餐死。
機種︰PS3
廠商︰SCE
類型︰AVG
售價︰約$338
Wario Land Shake it!奸角反傳統
咪以為呢隻橫向卷軸遊戲好簡單，其實玩法搞鬼而且動作多多，睇Wario 嘅表情同把聲已經勁得意，最頂癮係好多動作都要用Wii remote 勁fing 先可以過關，集搞笑同動作於一身，幾似成龍啲片喎！
機種︰Wii
廠商︰任天堂
類型︰AGC
售價︰約$360
末日戰曲Online 中文版初公開
耗時2年兼花費20億韓圜研發嘅《末日戰曲Online 》，畫面及系統都非常出色，玩家可以自行製作各式道具和裝備，又可以騎飛龍或戰馬攻城拔寨。難怪被喻為近年最佳嘅韓國遊戲，呢期更新增中文版server ，絕對值得一試。
機種︰PC
廠商︰雲起
類型︰MMORPG
售價︰免費
官網︰
http://lc.runup.com.tw/
絲路Forever 秦始皇陵圍攻兵馬俑
《盜墓迷城3》得啲疑似兵馬俑同秦始皇，睇落好似窒住窒住唔夠暢快，而呢隻《絲路ONLINE Forever ︰秦始皇陵》就打正旗號鬥再世秦始皇！而家改版有新迷宮同開放100級上限，等玩家挑戰古代千萬大軍，更有虛擬寶物送畀回巢老玩家，有玩過就一定要上線睇睇。
機種︰PC
廠商︰UNALIS
類型︰MMORPG
售價︰免費
官網︰
https://www.sro.com.tw/
Wii Upcoming 注目作！
節奏天國金裝版
之前喺GBA 推出後即大受歡迎嘅《節奏天國》，將音樂結合多款趣味性小遊戲嘅玩法，甚得玩家歡心，仲試過推出街機版添！今次喺NDS 出續篇就加入更多遊戲，令小遊戲數目多達50種以上，而且改用筆玩令變化更多，鍾意音樂遊戲就萬勿錯過。
（ETC ）7月31日
售價：約$280
XBox 360
Soul Calibur IV
（FIG ）7月31日 售價：$299
NDS
火燄之紋章 新．暗黑龍與光之劍
（SPRG ）8月7日 售價：約$355
NDS
三國志大戰．天
（ETC ）8月7日 售價：約$450
XBox 360
Tales of Vesperia
（RPG ）8月7日 售價：約$577
