味之天使JJ洩出浴照無線節目《味分高下》除咗志雲大師抬上天的鄧健泓搶鏡，仲爆出咗班「味之天使」，啤梨忌廉奶茶晚晚同你玩遊戲。
8位天使各有特色，不過講到最靚最索，首推梳打妹前美少女廚神冠軍JJ 賈曉晨，其他生果飲品真係講句多謝晒就算。
一枝獨秀，JJ 除咗電暈成班麻甩星，25歲女原來早已拍過出浴接吻戲，頭啖梳打一早俾國內同胞飲咗。港男？惟有飲恨囉。
賈曉晨（JJ ）05年未嗱美女廚神冠軍前，原來已經響內地做過女主角，佢擔正套內地電影《茶色生香》，只聽戲名令人覺得相當老套又有少少遐想，故事講述國內一名茶園老闆相當識食地聘用了幾位美眉一齊回鄉採茶賣茶，例牌男女主角戀愛大爆發。
五皮嘢車輪
JJ 自從殺落香港嗱埋美少女廚神嗰朵後，一直惜肉如金，不過之前於內地就大膽好多，於戲中沖涼拍拖接吻等鏡頭乜都有。連電影DVD 封面都以JJ 半裸露背作招徠，加埋JJ 於戲內同男主角有場激吻戲，自稱未拍過拖嘅JJ 初吻就係咁冇咗，真係諗起都火滾。
據JJ 講，《茶》戲是前經理人公司（現JJ 為「潮音樂」旗下藝人）幫佢接拍：「套戲響06年拍嘅，當時做女主角片酬有5萬。因為嗰時舊公司不停將我的資料寄畀各大電影公司，所以佢哋咪搵我試鏡囉，點知一拍即合，嗰次仲係我第一次做主角拍戲。」
JJ 貴為最索天使妹，雖然口音北味濃郁，但加埋嬌嗲聲線又好鬼配合，成功引到班男星神暈顛倒，參加《味分高下》嘅男星如孫耀威、歐陽Bobby 、洪天明等，個個都被佢電眼俘虜，爭住揀梳打埋身做拍檔。
內地失初吻
JJ 推拿至醒
賈曉晨JJ
年齡：24歲（9月20日生日）
三圍：33-23-33
身高：5呎5吋
賈曉晨JJ 出生山東，父母是回族人，因此自幼信回教唔食豬肉兼有個回族名叫法圖密（fatumai ）。除咗煮餸叻，JJ 讀書原來亦唔弱，她在濟南山東中醫藥業大學畢業，主修針灸推拿學，JJ 說：「我未讀完書就落咗香港做model ，所以未試過幫人睇病，最多都係同daddy
吓背咋！」
JJ 3年前來港後被發掘做龍友model ，上年簽新公司做裕美師妹，之前同曾志偉拍過套《魔幻賭船》，又響《伊莎貝拉》入面做杜汶澤老婆，不過全部客串，難怪佢仲未肯為藝術犧牲啦！
除咗孫耀威被JJ 搞到亂晒籠外，連有女友嘅洪天明（箭嘴）亦要拉實JJ 玩遊戲，搞到梅小惠要大叫：「又揀JJ ？唔准揀佢呀，其他女仔唔使出鏡呀！」有靚嘅唔揀，唔通揀你咩小惠姐。
主動出擊
JJ自稱平時文靜又被動，不過早排錄影《味分高下》時撞到谷德昭導演，即時主動鬆開件外套露出條蠻腰自我介紹：「Hi ，谷墮（導）演，我叫JJ 呀，你可（好）！」Full power 出擊，谷導演頂唔頂得住呀？
北方發電機
為證明JJ 人氣速飆，記者上星期就拉JJ 進行街頭測試，包括去街市買餸同周街問人借呢樣借嗰樣。結果雖然唔係人人講得佢係味之天使，亦未必講得出佢個名，但仍輕易電暈乾貨阿叔同賣魚阿勝，完全忘記海鮮乾貨價，總之平貨益靚女；而街頭少男面對索女JJ ，無論係原子筆或手提電話都有求必應，睇嚟JJ 如果唔做味之天使，大可以響街頭做上網sales ，絕對唔愁冇客人。
集體觸電
JJ 電眼有幾勁？上週四（6日）梳打現身牛池灣街市全力電街坊，加埋半鹹淡廣東話嗲爆，結果老中青街坊全部中招，建議下次JJ 不妨試吓當街賣寶藥，應該有市場。
即時繳械
第一站JJ 響街邊問人借電話，少男一見JJ 已經唔清醒，JJ 再加多兩錢肉緊話：「吓（可）唔吓（可）以借個掂（電）話畀我呀？」結果四眼仔即時迷失牛池灣：「OK 好呀……好呀！」四眼仔，你冇睇政府片呀，周圍都有電話亭㗎！
半價出貨
第二站JJ 轉向街市乾貨檔叔叔埋手，讀過中醫嘅JJ 同老細吹得兩嘴，再加
身揀貨問：「老闆……呢啲典（點）賣㗎？平啲嗒（得）唔嗒（得）呀？」老闆定力再好亦要投降話：「冇……冇問題……你咁靚女，半價畀你啦！」
魚佬認輸
第三站再搵少年賣魚勝測試，JJ 去到即時賣口乖：「我鍾意食汁（鯽）魚，奶色嘅湯對批（皮）膚好好㗎！」搞到開頭懶cool 嘅賣魚哥哥忍唔住話：「見係靚女，7折畀你啦！」JJ 行街市年中慳唔少。
周汶錡嗱彩
JJ 愈做愈紅，工作亦愈撈愈多瓣，除咗《味之天使》外，JJ 仲埋到潮星I Love U Boyz 堆，早前孖住一齊殺過澳門扮《蔡瀾逛菜欄》搞搞震，最新搞作係接周汶錡棒，拍住新食神Jacky 返她的山東家鄉拍《近廚得食Ⅲ》，JJ 表示：「我之前睇過《近廚得食》，梗係好開心啦，仲可以返去探屋企人。」JJ 開心，不過周汶錡冇得撈就似乎唔高興，週一（10日），周汶錡就話唔知乜嘢味之天使：「我唔睇香港啲娛樂新聞，亦冇睇乜嘢《味分高下》喎！不過就算無線搵我都未必有時間啦，一去要成兩三個月。」
係囉，做飲食節目主持都係留番畀啲新細路女做，反正你Kathy 姐咁少睇電視，等JJ 返鄉下光宗耀祖仲好啦！
拍住艾粒
JJ 俾I Love U Boyz 睇中，同tvbuddy 之一嘅蔣家旻（右二）過澳門拍攝《愚樂I Love U summer 》，JJ 仲賣晒口乖話：「佢哋（I Love U Boyz ）好百厭，乜都玩一餐，但係又冇整蠱我喎！」最緊要襟撈！
踢走汶錡
上次《近廚得食Ⅱ》由周汶錡拍住新食神Jacky 食勻成個台灣，新一輯監製話會去好多地方拍攝，每個地方都會由一位靚女負責，JJ 就負責家鄉山東嗰輯，介紹鄉下零舍有感情。
龍友獵物
JJ 樣靚兼有33C 上圍，未紅前成日做龍友model ，不過家陣彈起咗，遲啲仲話會夾埋同門師妹裕美拍電影，班龍友想再請得郁佢都幾難，惟有買多幾本雜誌止咳！
撼低陳法拉
JJ 出道日子唔耐，近排響《味分高下》入面仲鬼死咁搶，個個想知JJ 係乜水，搞到響Yahoo 人氣搜尋榜殺到上第2位，僅低過咪精徐淑敏，但已經超越無線新晉少男殺手陳法拉。不同討論區發現極多「嗰啲味之天使想點？」、「味之天使好難頂！」之類留言，惟獨對JJ 讚不絕口，話佢係8位天使中最索最靚，仲有網友話佢雖然口音北味濃，但樣靚搭夠，睇嚟，JJ 唔使練好廣東話喇，有鄉音先夠特色，大家齊齊親親祖國！
企位最筍
JJ 貴為最索天使，每次兩位主持庾澄慶同鄧健泓出場，JJ 都有得企正響隔籬，靚幾時都有著數。
JJ 於戲中被人奪初吻，港男全部冇份，難得佢仲好大方話：「咁真係劇情需要，都唔係好大膽啫！」
呢套《茶色生香》上年出街，奪咗JJ 初吻位男主角富大龍憑此戲嗱咗上海電影節最佳男主角，不過DVD 封面都係得個頭仔，明sell JJ 滑滑玉背。
浴室混戰
幾個女仔響浴室玩水咁百厭，JJ 做和事佬勸交，不過小心呀！條毛巾就跌落嚟喇！
