吳彥祖打入「建築界奧斯卡」

吳彥祖打入「建築界奧斯卡」

四十三歲嘅吳彥祖（Daniel）除咗高大靚仔有型，仲喺美國奧勒岡大學建築系畢業。最近，佢參與內地電視台真人騷《漂亮的房子》，就充分表現佢喺建築方面嘅才華。喺節目內，佢連同馮德倫、唐藝昕、伊一、黃仁德及潘宥誠組成「築夢小隊」，再夥拍真正嘅建築設計師張海翱，喺內地四個地點，幫舊屋翻新大改造。而節目嘅壓軸建築項目，仲要係由零開始，去到河北木蘭圍場草原石地上，幫當地嘅小孩同牧民，打造一座可以居住嘅圖書館。
由Daniel同佢嘅團隊設計，提出以傳統嘅蒙古包為藍本，集合幾個蒙古包成為一個大空間，加入咗象徵吉祥如意嘅「雙環」，形成最後嘅「雙環蒙古包圖書館」。特色係頂部有圓形嘅天窗，日頭可以採光，夜晚可以睇星星，周邊仲有落地玻璃設計，可以飽覽草原嘅景緻。呢個被命名為「木蘭坊」嘅圖書館，結果仲入圍被稱為「建築界奧斯卡」嘅一八年度「英國皇家建築師學會獎」，跟其他六十一個來自世界各地嘅傑出建築物，爭奪最高殊榮。
擁有專業建築知識嘅Daniel，喺節目裏面被稱為「吳工」，每次講到建築設計都頭頭是道，由畫草圖、測量、削木以至組裝傢俬，佢都做得有板有眼，吳彥祖不愧係「真•男神」，有樣仲要有埋內涵，直頭型到「核爆」呀！

真人騷節目《漂亮的房子》，仲有另外五個藝人參與，包括Daniel嘅老友馮德倫（右）。

戴起口罩同埋勞工手套，喺度鋸木嘅Daniel，勁有男人味，型到「核爆」。

擁有專業建築相關學歷嘅Daniel，連起屋都難佢唔到，既有外表又有內涵。

「木蘭坊」建喺蒙古草原上面嘅木蘭圍場，原本係清朝皇帝秋獵嘅地方，

建築中間部份係大廳，仲有睡房、廚房同埋餐廳，除咗係公共圖書館之外，亦可以住人。

Daniel帶領團隊設計呢個蒙古包外形嘅圖書館，命名為「木蘭坊」，入圍咗被稱為「建築界奧斯卡」嘅「英國皇家建築師學會獎」。

呢個草原圖書館嘅設計，最大特色就係有個圓形天窗，日頭可以採光，夜晚可以睇星星。