佗B七個月的甘比，個肚一日比一日大，但呢位有六百億身家的大肚婆不單只坐唔定，亦無有怕同人逼，繼續鬧市出沒。呢日佢帶住一對寶貝仔女秀樺（Josephine）、仲學（Joseph Junior）同埋友人去咗希慎廣場六樓HIPPER'S試食人氣梳乎厘班戟。呢間嚟自東京嘅甜品店，今年七月先至喺香港開業，日日排長龍，週末閒閒哋等成個鐘先有得食。甘比明顯吼準熱潮稍為減退，加上平日人流無咁多先至行動，精明！
一時用手機遮樣避鏡頭。
甘比仔愈大愈似爸爸，除了髮型，眼神跟面形同大劉倒模一樣。
上到車發現有記者影相，甘比女擺出趣怪表情。
友人的小朋友在甘比的保鑣陪同下前往餐廳會合甘比一家，一行六人食足成個鐘先走人，離開時發現有記者，甘比有點錯愕，見慣記者的秀樺先左閃右避，然後又鬼馬地攞頭髮遮樣，氹到甘比忍不住笑晒。反而囝囝Joseph Junior唔多習慣，加上商場人來人往，顯得不耐煩。三母子在商場對出上車離開，秀樺繼續發揮鬼馬本色，擺出趣怪表情，呢粒女點解咁得大劉歡心，不難理解。
甘比女表情多多，但囝囝似乎有點怕醜，不時偷望鏡頭。
甘比女同四眼朋友仔好好傾。
自細已經好可愛的甘比女，勁得大劉歡心。
七個月肚的甘比，腹部明顯隆起，但不及她手上拎住新鮮滾熱辣剛出爐的Kelly Retourné吸睛。(Kelly Retourné$91,400)
撰文：八珍
攝影：李玄
甘比女勁鬼馬氹死人
