陳柏宇昨日與模特兒女友符曉薇結婚，一對新人晚上在九展筵開40圍。
現年33歲的隱世歌手陳柏宇昨日小登科，在拍拖6周年紀念日娶模特兒符曉薇（Leanne），中午接新娘後離開尖沙嘴美麗華酒店，柏宇拖着穿露肩玫瑰紅裙的老婆現身，Leanne戴鑽石鏈襯5對龍鳳𠼦喜氣洋洋，柏宇反傳統做柴可夫，親載老婆到九龍灣舉行婚禮。
激咀十幾秒
昨午鍾舒漫、林奕匡與未婚妻李靄璣、Super Girls成員Yanny及Jessica及森美等現身觀禮。換上吊帶婚紗的Leanne在爸爸陪同下踏入會場，柏宇講完「我願意」後讀出誓詞，Leanne感動到眼紅紅，兩人交換結婚戒指時，柏宇在現場歡呼聲下激咀老婆十幾秒。簽紙儀式完成後柏宇再連咀老婆三啖，兩人正式成為合法夫妻。
一對新人在婚禮上化身接吻魚咀不停，甜蜜滿瀉。
Leanne拋花球時，台下姊妹爭相搶位。
陳柏宇以8,888元開門利是，跪地娶得美人歸。
新娘Leanne致辭時感動說：「好開心，終於嚟到呢刻，其實呢段時間自己成日發脾氣，多謝身邊人包容，好難搵得到……」柏宇插嘴得戚說：「一個比我更好，可以就得你。」Leanne撒嬌說：「係我可以咁就得你。」
柏宇用了8,888元開門利是娶得美人歸，問到接新娘是否過五關斬六將？Leanne投訴：「好失望，仲諗住可以難到佢，點知佢完全冇感覺，好似用wasabi溝香口膠，佢食完竟然話好味。」明天兩人即飛夏威夷度蜜月，問到會否趁機造人？柏宇坦言：「梗係會，而且仲有一盤計劃。」Leanne在旁聽到尷尬笑。
江若琳昨晚拖男友Oscar到賀。
江若琳取經
陳柏宇夫婦晚上在九龍灣筵開40圍，陳太換了低胸性感晚裝迎賓，小肥、關楚耀及應昌佑等現身飲喜酒，而江若琳則與男友蕭潤邦（Oscar）拖手到場，問到是否來取經，Oscar笑說：「係呀，今日嚟視察場地，9月我有音樂會喺度搞，我想睇吓有乜通道，可以運啲包畀大家食。我今年36，38歲前有啲嘢都要計劃吓。」問江若琳是否準備好兩年後結婚，Oscar即撫摸女友的頭，江若琳甜笑說：「我都OK嘅！」
採訪：馬健華
攝影：沈健程
from:
http://hk.apple.nextmedia ... 170703/20076704
