大台嘅賀歲劇《乘勝狙擊》，劇情都已經去到白熱化階段，之前就大曬鹽花，好重口味咁連續三集都有陳山聰同莊思敏嘅床上激戰，昨日更有週刊爆出《乘勝狙擊》嘅大結局，講到陳展鵬飾演嘅翟冠一同林夏薇嘅何正花，最後都有情人終成眷屬，至於由忠變奸嘅陳山聰，最後當然好似「BBQ」大結局一樣，壞人係冇好下場，死於陳展鵬槍下。
陳展鵬之前為父報仇，所以就犧牲咗自己同林夏薇嘅感情，後來林夏薇就同黃子恆飾演嘅周兆良結婚，但係林夏薇同黃子恆結婚冇耐，女方就發現咗陳展鵬原來係要向單立文報仇，唔想連累佢先分手。雖已為人妻，對陳展鵬唸唸不忘嘅林夏薇，就喺噚晚一集同黃子恆講離婚，仲走埋去澳門照顧受咗槍傷嘅陳展鵬。
昨日週刊就話被拋棄嘅黃子恆，受到陳山聰嘅教唆，擄走咗林夏薇嚟要脅陳展鵬，黃子恆仲強姦埋前妻，好在最後林夏薇都成功走甩，但黃子恆就俾陳山聰殺死。成功逃脫嘅林夏薇最後都可以同陳展鵬終成眷屬。
至於被網民形容衰過《幕後玩家》黃宗澤嘅陳山聰，佢除咗殺死黃子恆外，佢仲會殺埋莊思敏同師傅潘志文，仲同曾經出生入死嘅好兄弟陳展鵬反目，咁衰人當然係冇好下場啦，陳山聰最後死係陳展鵬槍下。
黃子恆接受傳媒訪問時，被問及可擔心觀眾覺你太癲呢？佢就話：「其實好難遇到起伏咁大嘅角色，對演員來說是幸運的，是有挑戰的，只不過在拍攝上比較傷神，演類角色需要很大精神和體力。而周sir本來是一個幹探，只是他的遭遇把他逼瘋了，希望播出的時候觀眾可以感受到角色上的喜怒哀樂。」
from:
http://hk.apple.nextmedia ... 170204/19917725
