日本女演員藤原紀香、中村雅俊同李彩華（Rain）噚日喺澳門威尼斯人，出席電影《一夜再成名》發佈會，紀香就以日式和服造型，大騷34E湯碗胸搶盡鏡頭，同場兩位行開性感路線嘅石川戀同池田依來沙，就打扮密實被比下去。
紀香喺戲中飾演婚後引退，之後再重踏舞台嘅演歌歌手，受訪時提到首次到澳門，佢話：「香港去過好多次，澳門是首次，一個好不同的地方。」提到戲中角色，紀香話好開心可以宣揚日本文化，又有機會同中村雅俊、池田等人合作。講到新婚生活，佢笑話：「結婚之後，同家人相處、支持同配合，可以集中工作，無後顧之憂。」
（左起）池田依內沙、石川戀、李引、藤原紀香及中田雅俊出席電影發佈會。
（左起）Bob、陳奐仁、李引同兩位日本演員石川戀（後右）、池田依內沙玩fb live。
李彩華（右）喺戲中飾演監製，噚日同連詩雅盛裝出席發佈會。
Rain兩年後結婚
此外，李彩華同內地小鮮肉李引有對手戲，Rain話：「好彩唔似佢家姐，唔係姊弟戀。」提到外界話佢樣貌有變，佢話日日敷mask：「最重要係骨膠原，阿媽日日煲靚湯。」
至於感情生活，Rain同過氣「新五虎」何遠恆拍拖已一年多，如冇變動，就會一、兩年後結婚。由於經常返內地搵人仔，Rain已變小富婆，問佢幾時上岸？佢笑話：「自己唔係闊太命，亦唔會上岸，自己鍾意工作，繼續做。」
撰文：馮仁昭
from:
http://hk.apple.nextmedia ... 161216/19866635
