Joyce Wong，全職媽媽兼美容blogger，兩年前買了一部Honda Freed代步開始接送女兒，經常要落九龍城挑戰S位。
停車場內，電動車位及傷殘人士專用車位，你就一定見過，但有冇見過有女性標記的圖案呢？在德國停車場，逐步開始有女人專用車位提供，職員解釋是為了安全理由，所以車位都相對近出入口及電梯口，夜晚單獨攞車都冇咁危險。其實上海亦開始有女性車位，不過主要是理解女司機泊位比較弱，所以車位會特別大及容易泊。
女人泊車渣似乎已成為大眾眼中的事實，教車經驗達十年的唐贊強師傅卻認為駕車技術沒有男女之分，「在我的角度而言不是男女的問題，是你對車的興趣及認識有多少？我只覺得男女的思維邏輯確實有點不同，女士的思考會直接一點，如果她們找對方法會駕駛得很好。」
家住太子道的Joyce Wong，全職媽媽兼美容blogger，牌齡16年，實情雪藏了14年，兩年前買了一部Honda Freed代步。老公無車牌，只有她做司機接送女兒，更經常要駕車到九龍城買餸開餐，經常要面對大部份女人最怕泊的S位。Joyce：「九龍城廣場的電梯好難搭，拎住幾斤餸去搭那電梯好痛苦，所以通常都會貪方便泊街。」
她又覺得自己泊位如何呢？「還可以啦，不過都唔敢挑戰難度太高的地嶽停車場。至於落九龍城，撞手神啦，有時泊得好快，有時泊得好慢。」邀請Joyce即場示範於九龍城搵位泊車，結果不停兜圈15分鐘，最後在獅子石道叫做搵到個位停低，算叫做泊到，不過扭了好多手軚先泊得夠貼邊。
唐師傅：「她套路是正確的，只是節奏錯了，回軚的時間不準確，所以位置泊得不夠正。」Joyce：「係，我見到位，心急便心怯，就會求其死扭入個位先，之後才想辦法怎算。」
唔想心慌泊S位？一啲都唔難！唐師傅話記住三個點。
第一點：前車右後門的手柄
假設要泊左邊S位，當準備泊左邊車時，車停在前車右邊，入後波，從司機位看著左後窗的左下角，若能看見前車右後門的手把，便可以開始扭左軚。
第二點：
後車左邊的車頭燈
繼續慢慢倒車，望著右邊倒後鏡，當鏡見到後車的左邊車頭或頭燈的時候，便需要立刻攞直軚環繼續倒後。
第三點：
前車右邊的車尾角
最後車身一直倒後，直至左邊A柱旁的窗角（即擋風玻璃的左下角），看到前車右尾角成一條平衡線，便可以立刻回盡右軚倒後繼續進入車位。
上完實習課，就叫Joyce實試做一次，「從來未試過泊得如此完美，只怕我日後未能重做一次這動作，不過師傅講那第三點好有用，之前學車冇聽過。」唐師傅：「其實最重要是要留意第二手軚時車身的斜度，斜度正確便好容易泊S位。」雖然Joyce依然需要師傅不停提點下才成功，但她卻認為只要時間多練幾次這套動作，這套泊位動作比之前清晰得多。
記者：許維雅
攝影：黃子偉、許先煜
唐贊強師傅認為駕車技術沒有男女之分，泊位只要記清三個步驟，沒有太大難度。
泊車記住這三點，便可輕鬆應付任何S位。
from:
http://hk.apple.nextmedia.com/su ...t/20161128/19847696
