《藍海》香港的播映權落在myTV Super身上，劇迷冇得免費睇。
韓劇在亞洲各地已掀起熱潮多年，今年韓劇亦大豐收，先後爆出神劇《太陽的後裔》及人氣的《雲畫的月光》，下半年劇迷瞄準另一套被視為必爆韓劇、由韓國女神全智賢和「長腿Oppa」李敏鎬主演的SBS新劇《藍海傳說》。週三開播的《藍海》挾住全女神產後復出之名，開拍至今受到全城關注，不過本地劇迷要煲《藍海》，首先要過足三關，銀彈充足、有耐性以及擁有無限數據。
世上冇免費的午餐，特別在無線身上，自《藍海》開拍消息公開後，各方都爭相搶購播映權，最終落在myTV Super身上，劇迷不要以為執到寶，可以任睇任煲，有劇迷就在網上投訴原來《藍海》不似《太陽》一樣，可以免費任睇。
之前Viu播《太陽》和《雲畫》就明益港劇迷，除了有免費繁體中文字幕版睇外，Viu在韓國播出街後4小時內就有得睇，緊貼韓國播放。不過無線就不會如此大方，無論裝電視機盒子還是裝App，煲《藍海》一樣要付費，手機服務380元睇一年，盒子服務最低消費要780元睇一年，焗住劇迷「科水」。
全智賢挑戰演技，飾演世上最後一條美人魚。
由韓國女神全智賢主演的新劇將於週三首播。
全智賢夥拍李敏鎬的《藍海》被劇迷視為下一齣神劇。
Viu更方便煲劇
劇迷等煲劇之餘同時要訓練耐性，今次的繙譯時間是Viu兩倍，《藍海》在韓國播出街後8小時後才有得看，對於心急而不介意睇簡體字的劇迷，其實凌晨時分在內地網已有不少簡體字幕版《藍海》觀看，要趕住瞓覺前追劇亦不是難事。而且有關的App也不像Viu一樣，Viu即使在沒有網絡的地方，也可以給預先下載劇集的劇迷隨時隨地煲劇，非常方便之餘亦為劇迷慳住數據。
468萬購入版權
有消息指今次有關方面以3萬美元（約23萬4千港元）一集購得版權，20集就花掉468萬港元，雖然在這場《藍海》爭奪戰中曾出現暗湧，但最終都成功購入版權。事實上自Viu今年憑《太陽》響朵後，各大播放平台都睇好韓劇市場，不過魚與熊掌不可兼得，想同步睇韓劇就要付費，除了myTV Super外、樂視和有線都要收費，僅得Viu提供免費頭輪韓劇，但劇迷擔心Viu未能以一敵眾，有一日韓劇市場會被收費平台壟斷，到時要睇韓劇就一定要有「錢」。
全智賢和李敏鎬早前遠赴西班牙拍攝外景。
五大看點引劇迷
到底《藍海》點解吸引劇迷？當中就有五大看點，此劇有女神男神坐鎮，全智賢繼神劇《來自星星的你》後的新作，加上亦有機會是李敏鎬入伍前最後的作品，自然令人期待。《藍海》是《星星》編劇朴智恩的最新作品，改編自韓國首部野史集《于于野譚》中的美人魚故事，李敏鎬和全智賢貫穿朝鮮時代和現代。
車太鉉和全智賢繼《我的野蠻女友》後，在《藍海》再度合作。
另外，《藍海》亦邀得車太鉉、Krystal、成東日演出，再加上靚景，先後到西班牙巴塞隆拿、帛琉、韓國忠清北道槐山郡取景。而《藍海》有別於《太陽》，貫徹韓國邊拍邊播方式拍攝，與《星星》一樣，邊拍邊播好處是可以因應觀眾的反應而更改結局。
撰文：施洛冰
from:
http://hk.apple.nextmedia ... 161113/19831782
