許冠傑噚日喺石硤尾開騷，同兩個仔懷欣、懷谷、鄧建明及雷有輝等合唱《天才與白痴》。
歌神許冠傑（Sam）噚日喺石硤尾嘅賽馬會創意藝術中心幫無線拍特輯，雖然現場冇冷氣，都吸引咗逾百人去睇，無線就安排咗吳若希、許廷鏗、胡鴻鈞同埋糖妹，分別同Sam合唱唔同嘅歌，好似吳若希就會同Sam唱《心裡日記》，許廷鏗就唱《明我以德》，吳若希話唔敢望Sam哥，但好開心對方第一次見自己就叫得出佢個名。
許冠傑喺賽馬會創意藝術中心拍特輯。
甩嘴要求重唱
噚日下晝兩點幾已經有歌迷聚集，Sam喺兩點半左右現身，好受得熱嘅Sam更無懼30幾度高溫，喺室外綵排依然戴帽、長袖衫同圍巾出動，唱咗《鐵塔凌雲》、《世事如棋》、《浪子心聲》等幾首歌後就入咗冷氣房休息。
迷你演唱會接近7點開始，Sam出場即唱《這一曲送給你》，之後又叫兩個仔懷欣、懷谷同契仔上台合唱《父母恩》，然後又同鄧建明、雷有輝、懷谷等人合唱《天才與白痴》及《半斤八両》，要求完美嘅Sam唱罷兩首歌嫌自己有少少甩嘴，仲要求重唱一次㖭，其實Sam噚晚有多首歌都被要求重唱，包括《鐵塔凌雲》、《明我以德》等。
撰文：馮仁昭
from:
http://hk.apple.nextmedia ... 160728/19712705
