Baby係愛貓之人，所養嘅摺耳貓啱啱喺清明節生咗小貓咪。微博圖片
今年27歲嘅楊穎（Angelababy）上年嫁黃曉明後仲未傳出造人成功消息，不過上個月佢屋企隻摺耳貓就生B，Baby就有喺網上報喜，日前仲講咗一番佢對養貓嘅「偉論」，即時引起網民熱烈回應，有人仲直斥佢無知冇腦，鬧唔停口。
咁Baby其實講咗啲乜嘢？之唔係佢話知道唔少獸醫都勸主人幫寵物結紮，但佢認為動物成世唔使返工，又唔需要做啲乜嘢，但係就將佢哋呢個權利都剝奪埋。佢仲話：「明白醫生嘅建議係想令小動物健康啲、長命啲，但佢覺得如果人為咗活到100歲，而成世失去某種權利同只係食冇味道嘅嘢，咁就冇乜嘢意思啦！」結果就俾網民鬧爆，仲話佢身為公眾人物傳遞錯嘅訊息。
Baby日前一番養貓「偉論」，網民熱烈回應，鬧唔停口。
有遺傳性骨骼病
其實網民咁激動，全因Baby養嘅摺耳貓貓種，本身有先天嘅基因缺陷，會有遺傳性骨骼病，但唔會喺年幼時顯露出嚟，貓年齡漸長就會慢慢出現問題，而貓咪本身亦會受到好大痛苦，所以一啲關注貓咪嘅組織都呼籲大家唔好再繁殖摺耳貓，點知Baby唔單止俾屋企嘅貓生B，仲話唔贊成結紮，網民又點會唔嬲？睇嚟Baby要做成功嘅貓奴，要用功做吓功課先喎！
撰文：馮仁昭
馮仁昭
from:
http://hk.apple.nextmedia ... 160511/19605911
