賭王三房千金何超蓮自去年12月與吳克羣分手後，變回單身「筍盤」隨即引來一班富二代爭住追，近日再添一員，就是曾在北京涉毒台星柯震東。柯震東與台灣女模女友李毓芬分手一個多月即傳出與超蓮撻著，女方上星期日更飛到台北，二人被影到深夜唱K，當中柯震東更箍頸夾實超蓮，狀甚親暱。超蓮回應本報否認有戀情，表明自己單身，即是柯震東仍屬觀音兵級別。
現年24歲的賭王「最索千金」何超蓮去年含淚與台灣歌手吳克羣結束4年情，多次表明感情狀況是單身，要拚搏工作，但緋聞依然車輪轉十分旺市，當中包括富二代霍啟山、內地百億高富帥二代政協劉根森、楊受成細仔楊政龍、向佐等觀音兵。雖然啟山多次約會斷正佔先機，但就算三太大開綠燈都未能再進一步成拖友，家姐超雲都不禁笑超蓮慢慢揀。
【搭膊攬實】
超蓮上週日飛去台北，被影到與柯震東攬實唱K，態度親暱。台灣《壹週刊》圖片
【高調捉手】
等電梯期間，柯震東忽然伸手捉實超蓮玉手。台灣《壹週刊》圖片
何超蓮被封賭王「最索千金」，回覆單身後，曾與富二代霍啟山、劉根森等約會，身邊緋聞停不了。資料圖片
搭膊扶手勁親暱
昨日超蓮又有新緋聞浮現，她原來飛到台北過週末，更被雜誌拍到與前年在北京涉毒的台灣男星柯震東深夜唱K，當時身穿牛仔褸超短褲的超蓮大騷長腿，與柯震東及男女友人現身台北，二人在大堂等候期間，柯震東更出手搭實超蓮膊頭、扶她手臂等親暱動作，可見二人都相當熟絡。
鍾情台北的超蓮沒拖拍依然愛重臨舊地，不時密密飛台北，如上月才與啟山前來嘆牛肉麵，今次就與柯震東唱K，難免令人懷疑撻著有新戀情。論年紀二人同是24歲，外形上更相當襯，加上超蓮一向愛追星，故柯震東亦稍佔優勢。另一邊廂，柯震東與蕭亞軒於前年分手後，與另一台灣女模李毓芬再展開「姊弟戀」，其間女方更陪他經歷涉毒低潮，融入柯家上下，不過二人近月因工作各有各忙分隔兩地，而男方亦未戒夜蒲喜好，最終於一個多月前分手。分手不久、回覆單身的柯震東，當然繼續喜愛夜蒲，據知由房祖名介紹下認識超蓮，估不到相識不久，二人已撇低他與另一友人聚會，感情發展可算迅速。
本報昨日致電超蓮問關於她與柯震東的緋聞，她否認與對方拍拖：「我同佢唔係識咗好耐，識咗半年，喺台灣識，一大班朋友出嚟玩識咗，冇單獨約會過，全部一大班朋友。」雖然柯震東已分手回覆單身，但有指李毓芬從朋友圈得知他與超蓮唱K時親暱一事，大表呷醋，超蓮回應說：「人哋嘅嘢我唔知，亦唔回應，我𠵱家係單身啦，係認真做嘢階段，好好拚搏，拍拖嘅嘢隨緣。」
柯震東與舊愛李毓芬拍拖時，不時被影到齊齊夜蒲，但二人於一個多月前已分手。台灣《蘋果日報》
李毓芬
超蓮今年2月在台北醉酒，其身邊友人即急召她舊愛吳克羣前來照顧。台灣《壹週刊》圖片
平時以簡訊聯絡
記者問到二人唱K時，被影到柯震東攬到實，超蓮就解釋：「因為去台灣玩，一大班人唱K飲嘢，可能飲咗啲嘢，行入去時候佢gentleman風度扶一扶我，搭一搭我，普通朋友又唔係好過份親密，正常社交，大家唔好諗咁多。」另外，柯震東昨透過經理人回應：「他們就是好朋友，私下還是會簡訊聯絡，但近期比較少聽阿東提起。畢竟藝人私下交友，公司不會幹涉，外界不用揣測。」
採訪：唐如
from:
http://hk.apple.nextmedia ... 160421/19579346
