謝安琪Kay紅館跳篋舞

人妻謝安琪（Kay）昨晚及今晚在紅館舉行兩場「拾回謝安琪數愛世界巡迴演唱會」，昨晚首場8時40分開騷，台上佈置都以旅行篋為主，Kay穿著蝦肉色皮裙以一身rock爆造型亮相，由於昨晚的舞台設計都以旅行篋為主，Kay亦是在台上一個巨型大篋升出來，而巨篋打開後其實是一個LED大電視，Kay唱兩歌《勢不兩立》及《篋神》，大跳篋舞。

採訪：張俊銘
攝影：仇志德
from:http://hk.apple.nextmedia ... 160416/19573357

Kay前晚邀請Juno任個唱嘉賓，他大讚Kay是可以交心的朋友。

謝安琪前晚跟林海峰合唱一曲《廣東歌》外，更有跟麥浚龍（Juno）合唱《羅生門》，Juno在台上說：「好多謝，亦都好開心。上年到今日都有機會可以同阿Kay合作，我自己覺得好感動。無論音樂定私底下都有好多嘢分享，上年都有好多得着，唔係只係獎項，而係搵到一個可以交心嘅朋友，呢個係好難得。」Kay聞言竟自爆說發夢見到Juno：「呢個係秘密嚟，不過見到你嘅時候，大家都冇做啲乜嘢嘅，都係好型咁企喺度啦！」

林海峰在台上與Kay合唱《廣東歌》。

之後吳業坤與Kay合唱《因為愛情》，唱完後Kay跟坤哥抱抱時，忽然驚叫說：「我聽到我條裙『啪』一聲！你幫我睇吓背脊係咪穿咗個窿吖！」坤哥隨即表示聽到有聲，但就未見裙子穿窿。其後Kay囝囝張瞻在後台碰見坤哥時，竟問坤哥：「你係咪明星？」認真搞笑。
from:http://hk.apple.nextmedia ... 160417/19574337

Kay在個唱尾聲唱《囍帖街》時，忍不住用手遮眼爆喊。

入行十年的人妻謝安琪（Kay），前晚假紅館舉行尾場「拾回謝安琪數愛世界巡迴演唱會」後，正式暫別樂壇了！甫開場Kay即high爆說：「我今晚唔留力㗎喇，我想分享過去十年音樂路程冇枉過，令我驕傲！」

為了有一個完美暫別，Kay請到偶像劉德華做尾場嘉賓，兩人又跳又唱《我恨我痴心》，Kay肉緊抱抱又用手掃華仔心口，觀眾尖叫拆天，唱完後華仔反客為主笑說：「再一次畀掌聲安琪！」還攬着Kay的腰落台令她冧爆。另一嘉賓樂隊Supper Moment就大讚Kay是香港女神，前晚她再唱《雞蛋與羔羊》和《家明》，觀眾鼓掌大叫：「謝安琪！我愛你！」

做好家庭崗位

尾聲時臨別依依，Kay唱《拾回》喊着多謝作曲的馮家俊，之後唱《The One and Only》再度眼濕濕，到《囍帖街》更用手遮眼哭着說：「有一個人，我從來都冇多謝佢，我今晚想多謝佢。佢其實好細膽，唔算係好有自信心嘅人，唔係好識交際應酬，所以佢唔係好多朋友。佢經歷好難頂嘅時候，佢就嚟死㗎喇，但佢都捱過咗。呢個人，就係十年前嘅自己。」最後Kay唱完《山林道》完場，在觀眾安歌下再出場唱《跟我走》。

之後Kay出席慶功宴，否認與經理人夏森美不和才暫別，她說：「呢啲係外太空消息，我哋一路都係好友，我今次休息佢都好體諒，係佢提醒我嫁人後要好好照顧屋企。」之後會否自組公司？她說：「我真係休息嘅，要做番好家庭崗位。」問為何不多謝老公張繼聰？她笑說：「我成個人都返屋企喇喎，佢應該多謝我先。我為咗佢放低工作，都有所犧牲㗎！」

至於夏森美亦否認跟Kay不和：「呢啲係juicy嘅講法啫，如果鬧翻好多公司會玩雪藏，你見我哋做嘢都係盡心盡力。」

採訪：盧妹
攝影：陳俊強

前晚尾場個唱，Kay邀得偶像華仔任嘉賓，她更用手掃華仔心口。

獲台下fans支持的Kay，以一曲《山林道》完場。

張繼聰前晚現身Kay個唱慶功宴力撐老婆。
from:http://hk.apple.nextmedia ... 160418/19575265