亞視開台元老夏春秋、八朝元老葉家寶和鮑起靜等開心團年之餘，更寄望亞視員工盡快有糧出。
天下無不散之筵席，有58年歷史的亞視將於4月1日被釘牌。臨別依依，本報請來亞視老臣葉家寶、夏春秋、鮑起靜、黎燕珊等出席團年飯局，回味他們走過的亞視光輝開心日子。眼見年關將至，亞視員工仍慘被拖糧，一班藝人衷心希望亞視員工「出糧平安」、「日日有飯開」，開心迎猴年。
知否世事常變，亞視原是永恆？陪伴香港人成長的亞視，距離釘牌不足兩個月，便因為連續兩個月拖欠薪金而面臨提前結業及停播命運。臨別依依，本報請來亞視八朝元老葉家寶、歷代亞視台柱包括六合彩之父夏春秋（冬叔）、鮑起靜、斑斑、黎燕珊、黃麗梅、張立基、吳浣儀及現任亞視藝人袁潔儀、劉錫賢和六合彩之子蔡國威，出席亞視「引退」前最後一個團年飯局，陣容比起亞視近年台慶還更鼎盛熱鬧。
食肆老闆（右）派真利是和六合彩，黎燕珊和劉錫賢等興奮大叫。
劉錫賢（中）希望亞視台前幕後「出糧平安」。
早啲摺埋仲好囉
一班早已各散東西的亞視藝人當日開心團聚，一起回味當年亞視邱德根和林百欣年代最輝煌、最開心的日子，與今日屢次拖欠薪酬的「無糧亞視」相比，簡直是天堂與地獄。眼見亞視員工年關難過，一班藝人誠心送上祝福，希望員工「出糧平安」，黃麗梅說：「最重要出咗糧畀員工先，反而節目播唔播都唔重要。老闆股東如果有心有能力去繼續做呢間公司就要畀啲誠意、畀啲行動，唔好成日有個希望員工，到時失望好慘㗎嘛！」鮑姐亦戥沒糧出的員工慘，她說：「個老闆一毫子都唔肯攞出嚟經營，由得佢早啲（結業），唔好害咗大家。」對於亞視分分鐘提早結業，冬叔說：「早啲摺埋好囉！無謂令到啲人咁辛苦喺度等，伸長頸嚟等啲糧！」
黃麗梅：「最希望最希望員工有糧出。
六合彩之子蔡國威，與六合彩之父夏春秋。
(左起)斑斑、吳浣儀、鮑起靜同劉錫賢，視亞視如屋企。
六合彩「父子檔」冬叔和蔡國威均指主持六合彩是自己代表作。
冬叔：應該要洗牌
84歲的冬叔，1957年便加入麗的映聲（亞視前身），是亞視開台元老，見證亞視興衰。冬叔說：「做咗好多節目都好經典，主持咗六合彩就更加㖭啦，係人見到我都話財神爺，問我攞貼士，我話冇貼士，最緊要自己行運，同埋唔好成日轉number！」問亞視停牌可覺可惜？冬叔說：「冇話可唔可惜，始終有終結嘅日子，人同事物一樣，冇舊又邊有新？而且亞視經歷過咁多波折，都做唔到一個成就，咁應該要洗過牌啦！」當日飯局，食肆老闆忽然現身大派真．六合彩和二百元大利是，令冬叔等興奮不已。最後冬叔率眾人說：「亞視永恆，恭喜發財。」期望人人開心迎接猴年。
採訪：戴彩煥、嵐山 攝影：葉君海、沈健程
鳴謝：唐宮壹號
首屆亞姐冠軍黎燕珊、亞姐之父葉家寶及首屆未來偶像冠軍張立基。
黃麗梅、寶珮如及潔儀姐姐，因合作《今日睇真D》而成為好友。
亞視團年飯局菜單
三星拱照
撈起撈到風山水起
當紅報喜鵲
花開結果
嘻哈大笑
發財大好市
年年有魚
三羊壠泰
大吉大利拼金盆聚寶
from:
http://hk.apple.nextmedia ... 160205/19479968
