沈穎婷（左）與同是曾參加選美的鍾溥敏，日前受訪時即席練習，出拳起腳打到啪啪聲。攝影：陳志嵐
李影女兒沈穎婷（Winnie）選美後發展平平，現時半腳踏出娛樂圈，另覓出路謀生，幕前未有工作之際，要身兼兩職捱世界，稍後還會受皮肉之苦打擂台，對戰前落選港姐鍾溥敏（Mandy），兩女練習時出拳起腳拳拳到肉啪啪聲。
沈穎婷（右）最擔心鼻子中拳流鼻血。
鍾溥敏中拳想喊
沈穎婷和鍾溥敏同是港姐出身，已離開無線個別發展，沈穎婷除了兼職做香煙女郎外，亦在馬會兼任Racing Specialist一職，向客人簡介基本賽馬資料，由娛圈內跳出打工捱騾仔，沈穎婷不介意世俗眼光，反而為自力更生感自豪，收入不過不失，她說：「我唔係離開娛樂圈，我仍然想搵拍戲機會，但暫時未有機會，做嚇模特兒同其他工作先，我係好鍾意拍劇嘅。有兩份長期工作好託賴，喺馬會我學到好多嘢。」而鍾溥敏則現職網站編輯，兩女湊巧愛上打拳，今次有緣在擂台上相聚。
沈穎婷正式接觸打拳已有十年，近日立心加緊操練，目的是為了下月13日出戰「Energy Fight2015」一場擂台戰，操練期間三兩下踢腿出拳已經汗流浹背，極具艱苦挑戰，沈穎婷說：「想為自己做啲嘢，呢個運動收身又健康，呢幾個月狂操，手臂同腹部肌肉都紮實咗。」
正所謂落場無父子，選擇玩拳賽亦有心理準備受傷，幸好未嘗爆缸滋味，沈穎婷笑言：「我發現鼻高易中拳，有啲擔心會流鼻血。」而Mandy則說：「曾經試過中拳被擊倒想喊，但怯就會輸一世，即使我哋兩個女仔對打，邊個捱多兩拳你都會出盡力反擊。」此外，沈穎婷透露正考慮會否邀請母親睇比賽，擔心見到媽媽會怯場。
採訪：卓寶花
場地：榮拳館
沈穎婷除了做香煙女郎外（圖），亦在馬會做兼職。《FACE》圖片
沈穎婷擔心媽咪李影（左）睇打拳會怯場，故仍未邀請她睇比賽。
from:
http://hk.apple.nextmedia ... 151121/19381535
