最近頻密亮相的龔嘉欣及楊明，合作多次，早已老友鬼鬼，二人更陪對方經歷低潮期，龔嘉欣直言很想在台慶頒獎禮雙雙攞獎，相反楊明揚言不計較獎項，但叫女方攞獎時就一定要多謝佢，他更指若龔嘉欣到40歲都冇人要，會考慮對方，果然能成為密友大概總帶着愛！
楊明與龔嘉欣識於微時，陪對方經歷事業高低。
楊：楊明、龔：龔嘉欣
唔急住上位
龔嘉欣及楊明今年備受力捧，兩位當事人當局者清，深知上不上一線還在其次，做好手頭工作最重要。龔嘉欣更直言希望頒獎禮可與楊明雙雙攞獎，算是對過往努力做個交代！
兩人極有默契，談情說愛絕不尷尬！
楊明憑《梟雄》入圍飛躍男演員，演技獲讚。
楊：嘉欣，你呢期犀利，又做《無雙譜》，《愛．回家》又見你，《張保仔》都有份，三線劇都有你！爆騷啦，請食飯呀！
龔嘉欣將工作放第一，看來想做個事業型女性！
楊明於馬來西亞先拔頭籌，奪飛躍演員獎。
任模特兒入行的龔嘉欣，直言現時要急起直追。
龔：請食飯冇所謂，其實呢個機會（三線都有份）好難得，我都好開心！諗番當初收到通知要演《愛》，公司叫我畀心機，唔只自己，仲要令成個團隊都做好，我覺得自己有份責任！你夠被人話《收規華》完，《張保仔》又見你，被人力捧啦！
楊：係咁啱上年拍落差唔多時間推出，上年我真係拍咗好多，仲有《刀下留人》同《梟雄》，冇話捧唔捧，總之收到角色就做好佢。有人話依家缺小生，我唔覺喎，公司有好多小生，有時又會喺出面搵，其實我慢慢做，角色愈來愈重已經好開心，一唔一線唔重要！萬一角色重，我處理唔嚟，咪仲差！
龔：我就覺得每個人都有佢嘅特質，公司會分配適合嘅角色畀我哋，觀眾係睇得到嘅，所以唔使諗話要去到邊個位置！反而我希望今年可以同你一齊喺萬千星輝頒獎典禮攞獎。
楊：到時我冇獎咪好難睇？不過你攞，我都好開心！
龔：同你識咗咁耐，今年見到你有咁多作品，都好想睇到你攞獎，最好梗係大家都有獎！我會感覺好似努力多年，終於一齊考到好成績！
感性淚鬥淚
楊明劇接劇，曾因開工試過一個禮拜留公司瞓冇返屋企，而龔嘉欣於《無雙譜》演青鳥，除挑戰演技做獨腳戲，更吊威吔十幾個鐘！
楊：攞獎唔攞獎，對我唔係大問題，但你攞獎就一定要多謝我！
龔：點解？
楊：因為我成日睇到你喊囉！
龔：你夠有對住我喊！
楊：幾時？你講我阿媽入醫院做手術嗰次？係，嗰時我有啲崩潰。
龔：你係孝順嘅，話時話，伯母有幾耐冇見你？
楊：之前我拍《收》同《刀下留人》，為咗慳番啲車程，索性留喺公司瞓覺，試過一個禮拜冇返屋企。
龔：我就幸福呢，最多只係試過兩日冇瞓，但我就算點，都要返屋企沖涼！不過辛苦唔係講有冇覺瞓，而係壓力！我拍《無》，完全靠自己想像，冇人同你做對手戲，好彩導演成日話我做得唔好，再做！係好沮喪，但要多謝佢，個劇出街，我微博多咗成百個留言讚我！
楊：我有睇，有幕講你變咗隻雀，同蛇妖打！
龔：今次好多綠幕同吊威吔，播出嚟可能幾分鐘，但拍就拍幾日，我演青鳥，講對白同打戲都冇得落地，吊威吔十幾個鐘，好難忘！你喺《收》都打得型吖！
楊：因為我跟武師學咗兩個月打，佢哋知點樣打會好睇，加埋導演用鏡頭就。有記者問我，點睇《收》監製方駿釗話我係時候發力？我靜咗咁多年都係時候，我唔再係o靚仔，要努力，但平常心。嘉欣你都係時候發力！
冇避忌咩都講
心態變得成熟的龔嘉欣，現時將工作放第一，而楊明亦笑言等到龔嘉欣40歲冇人要就考慮佢，女方亦叫楊明50歲搵唔到老婆可以揀佢，兩人毫不避忌嬉笑，果然係密友！
龔：我依家每日就係返工拍嘢，放工睇劇本，我唔再嘥時間喺其他嘢身上，尤其依家咁多機會，我將全副心機擺喺工作，我好清楚依家要啲乜，依家工作佔咗我七成時間。你呢？好多姿多采o架！
楊：唔好講到我好似有拖拍咁，拖呢，唔係話唔拍，不過工作為先，有嘅唔抗拒。你連睇戲都冇時間，人哋點同你拍拖？
龔：我係因為啲緋聞嚇怕追求者咋！你都試過亂講話鍾意我，搞到傳緋聞！
楊：幾時有？你鍾意我咋！嗰時同你拍《誰家灶頭無煙火》，係產生咗啲好濃郁嘅友情，之後再演幾次情侶，至傳緋聞啫！
龔：你依家34歲，不如到你40歲都搵唔到老婆，你考慮吓我？
楊：你40歲冇人要，我就考慮吓！
龔：你先冇人要！講緊你娶唔到老婆呀！都係講大啲，到你50歲都搵唔到老婆，考慮我囉！
後記
龔嘉欣楊明分屬老友，傾起偈上來熟不拘禮，當講到雙方的優點時，楊明讚龔嘉欣靚女、做嘢認真，女方則大呻未夠誠意，笑言講楊明要「直接去缺點」，而兩人拍攝時更甜蜜拖手零尷尬，完全係好姊妹或好兄弟的表現！
文：影視組
攝：劉斌
龔嘉欣化妝：Sammy Lam @ gardenia
服裝：Caxx Carash
From:
http://orientaldaily.on.c ... /00282_080.html
