喺2011年同內地導演王全安結婚嘅「星女郎」張雨綺，喺舊年9月，王全安涉嫖妓玩3P被捕兼入獄，雖然王全安出冊之後，有內地網民見到佢喺張雨綺嘅新居出現，以為佢哋關係有好轉，點知喺上個月喺微博宣佈離婚，結束呢段短暫婚姻。
張雨綺、韓國型男權相佑噚日喺北京出席電影《情敵蜜月》首映，呢次係張雨綺宣佈離婚後首度現身，張雨綺全程表現大方，講到佢同王全安目前嘅關係，佢話各自安好，感情事採取隨緣態度，有啱有就一齊，冇就專心工作，跟住問再見係咪朋友？佢就話：「他只要有好的劇本拍攝，我一定會接拍。」
膝蓋要做手術
因為有膝蓋積水問題，張雨綺喺活動後即刻換番對平底鞋，佢話：「西醫建議立刻開刀，但因為我10月馬上要投入新片拍攝，加上要為《美人魚》配音，工作排得滿滿，怕膝蓋一開刀，可能連站立配音都困難，所以目前以中醫治療。」至於今次喺《美》同周星馳再合作，佢哈哈笑話：「大家還是很有默契，我一進組就發現，嘩！都是熟人啊！」
from:
http://hk.apple.nextmedia ... 150826/19269766
