《蘋果》見證周秀娜由𡃁模變女神,娜姐未來希望成為不失性感的美麗女人。
攝影:周樂恒
造型:林嘉慈
髮型:Kel Fung of HH hair.nail
化妝:circle Cheung of ND&Co.Co
服裝:Versus Versace
本來寂寂無聞的周秀娜,6年前的處女寫真集,博到盡疑似露暈做賣點,迷倒一眾宅男,同時掀起娛樂圈𡃁模潮。娜姐的彈出,完全夾啱天時地利人和,過去幾年努力,她已搣甩𡃁模之名,她說:「我唔介意話畀人知我係𡃁模出身,每個人有唔同階段,係見證成長。」娜姐寫真中舔雪糕漏奶畫面仍記憶猶新,她說:「至少𠵱家食雪糕都會諗起我。」𡃁模升呢演員,如小童變成人,娜姐回顧這成長階段:「我唔後悔自己嘅選擇,當下選擇永遠最好,嚟到呢刻,我會好好諗吓𠵱家同以後。」娜姐期待未來演員路可繼續精采。
問到娜姐出道至今的代表作,她說:「就係呢一刻我有機會畀《蘋果》揀中做20周年特輯訪問人物,大家好錫我。」娜姐對《蘋果》有甚麼感覺?她說:「多謝由我出道至今,一路咁支持,我好鍾意睇《蘋果》,佢好跟得上潮流,有自己立場,好鮮明,我鍾意睇《動新聞》,佢永遠求鮮,《蘋果》行得好前,跟住時代進步。」
【2009】
周秀娜引爆𡃁模熱,當年舔雪糕一幕引死不少宅男。
不封胸做美魔女
上月底踏入30歲的娜姐揚言決不封胸:「每個人有屬於佢嘅獨特形象,我好想keep住,將來做咗美魔女,前面都希望有『性感』兩個字,女人唔同年齡有唔同韻味。」初登大銀幕娜姐抗拒當花瓶,但現在卻開竅盡力演每個角色,她說:「最緊要清楚知道導演喺部戲裏邊,想要你做乜,我最初好想畀觀眾知,除咗性感之外,我仲有第二方面,𠵱家我明白,角色有冇盡力大家一睇就知。」
娜姐近年既入股經理人公司,又賣自家品牌胸圍,她說力不到不為財,但仍相信專長要做好演員本份,她渴望拍一部以女性為題材的電影,不介意內容涉及敏感的斷背情:「對手要強勢過我,我鍾意周迅,佢剛柔並重。」娜姐已達適婚之齡,對感情卻隨緣:「冇得急,我覺得兩個人一齊,唔係鍾意就得,要相處,一切順其自然。」
撰文:比華利
from:
http://hk.apple.nextmedia ... 150620/19191310