JW想當年因為靚聲被賞識，但多年來推出的作品寥寥可數。
資料圖片
黎明（Leon）和林建岳於04年成立的唱片製作公司A Music，繼衞蘭於今年年初約滿離巢後，再爆出另一女歌手JW（Joey Wong）嗌走，JW早前曾透露與A Music仍有一段時間合約，但原來她已經解約。換言之，A Music目前只剩Leon及主力在內地拍劇的李治廷兩個男丁！
未有新公司都走
據知情人透露，JW本來尚有兩年合約，突然提出解約，是不滿唱片公司管理層答應過她的事，統統不兌現，終於谷到爆向Leon提出斬纜要求。知情者說：「衞蘭啱啱走，唱片公司高層即刻揾JW傾偈，話會將公司資源擺喺佢身上，講到天花龍鳳，每次向Leon匯報都好多plan，但Leon行轉背去拍戲，就好似失憶當乜都無講過，JW覺得唔可以再咁落去先提出解約要求。」
JW於10年加盟A Music，當年Leon花費過百萬，務求將JW打造為衞蘭以外另一位靚聲王，第一首主打歌《掛念好友》更出動當年仍是「黎明嫂」的樂基兒擔任形象顧問。雖然JW不負眾望，唱功獲一致好評，無奈五年來她只推出過兩張唱片，作品僅得十多首，令她感到極失望且失去方向，個多月前她在Instagram留言：「其實我真係好鍾意唱歌……我都好希望可以快d有新歌比大家聽……！Stay with me.」對自己遲遲未有新歌，明顯感到不滿。
JW曾是黎明力捧新人之一，可惜今日解約收場。資料圖片
左起：文詠珊（Janice Man）、JW、衞蘭曾被封為3J，但先後離巢，現只剩李治廷（右）仍跟隨黎明。資料圖片
日前Leon被問到歌手約滿都離去，曾表示唱歌要迎合齒輪，新人要講運數。據知，JW今次主動提出解約，Leon亦一口答應，未有留難。本報昨日致電JW求證解約一事，她直認不諱：「我𠵱家已經係自由身喇！」是否不滿三年多冇唱片出？JW說：「總之係和平分手，內容唔想講咁多喇！多謝關心！」問JW有甚麼新計劃？她坦言有唱片公司跟她接觸：「𠵱家傾緊好多嘢！唔心急，我好鍾意唱歌，一定會繼續唱。」
採訪：小米
【逐個走】
緣盡就分手，黎明揸旗的公司A Music，繼早前衞蘭約滿離巢後，連JW也宣佈要同黎明分手，目前A Music所剩的歌手，除了黎明本人外，就只有轉到內地發展的李治廷。
楊千嬅
千嬅07年由金牌過檔後，屢傳出與黎明意見不合，09年約滿即走。
衞詩
衞詩09年於日本因藏毒被捕，黎明其後以「特工論」宣佈結束合作關係。
應昌佑
05年加入時獲力捧，但發展麻麻，曾拍港視劇集《還來得及愛你》等，去年約滿。
王歌慧
06年加盟，只有兩首作品《聽說》及《大話精》，亦有拍港視劇，今年年初約滿。
衞蘭
被黎明形容為「肥過電單車」的衞蘭，離巢後不時𢱑撈，不忘預埋細妹衞詩。
from:
http://hk.apple.nextmedia ... 150411/19108070
