今年35歲嘅楊怡同細佢五年嘅羅仲謙拍拖三年，有傳好事近，會喺今年八月拉埋天窗；但呢排盛傳新一代「發電廠」蔡思貝明目張膽姣媾謙謙，激到楊怡要趕男友離開自己喺將軍澳嘅寓所兼推遲婚期。不過，謙謙不嬲冧女招數多，好快就「降服」楊怡成功箍煲。
噚日有讀者喺紅磡售樓處見到楊怡同謙謙一齊排隊，準備買將軍澳日出康城嘅緻藍天新樓盤。據悉，嗰個樓盤主打三房及四房，三房入場費603萬，比起近年高企樓市屬平盤，首日發售吸引過千人排隊。楊怡和謙謙噚日一早蒲頭，讀者李先生表示，朝早十點半左右，見到佢哋兩個戴住眼鏡、帽同口罩，同普通市民一樣喺最低層開始排隊，因為噚日天氣頗熱，但兩人就由頭包到實，似足焗桑拿咁，反而仲引人注目。李先生話當時佢哋兩個身邊仲有其他人，包括楊怡媽咪同經理人嘉莉，羅仲謙就同助手同行。排隊嗰陣謙謙同楊怡都好避忌，全程低頭唔出聲。
楊怡同謙謙戴曬帽、眼鏡兼口罩，但反而仲令人注視。
讀者提供圖片
羅仲謙、楊怡
資料圖片
有傳蔡思貝（圖）早前姣媾謙謙，激嬲正印女友楊怡。資料圖片
「我都想呀」
大概晏晝四點半，本報記者發現楊怡同經理人現身停車場，一身小雲look嘅楊怡狀甚輕鬆行去攞佢架80多萬元嘅Range Rover越野車，問佢係咪買樓？佢有啲失望咁話：「冇買到呀，我睇之嘛。」準備結婚用？楊怡完全唔掩恨嫁心情：「下年結婚？冇咁快呀嘛，我都想呀！哈哈！」佢話打算買樓投資用，再追問係咪同謙謙一齊買樓？佢就話：「你問佢喎，我唔知，大家都係投資啫。我同經理人，仲有媽咪一齊睇。」然後禮貌揮手，同記者講Bye Bye，明顯心情靚到爆！
採訪、攝影：徐錦池、陳辰
from:
http://hk.apple.nextmedia ... 150405/19101651
