彭浩翔執導嘅《撒嬌女人最好命》喺內地收咗兩億三人民幣，香港就收近千三萬港元票房，成績算唔錯。前晚阿彭特別趕返香港搞慶功宴。而五、六月佢會幫《春嬌與志明》編劇陸以心執導嘅三級片《同班同學》做監製，呢部戲係講三位問題少女無心讀書，離開家庭之後一齊住，為生活要去做援交少女，後來佢哋竟然同時喜歡咗同一個男人。
如果想拍彭浩翔監製新戲，就要留意佢fb個招考女主角廣告。
搵古仔客串
最近阿彭喺自己facebook賣咗個廣告，個廣告登咗楊千嬅、梁洛施同陳靜（DaDa）攞獎嘅相出嚟，然後標題寫住：「你想成為她們一份子嗎？」以佢哋做辦去吸引新人嚟面試。陸以心部戲要招收三位女主角，只要外貌活潑、甜美可愛，講流利廣東話，年齡喺十六至二十六歲之間，唔介意有全裸演出嘅少女，隨時歡迎佢哋嚟試鏡。噚日問阿彭部戲係咪又放棄內地市場，佢話：「呢類片種好難喺內地放，所以唔可以拍得太貴，成本一千萬內搞掂，主要由太陽娛樂同古仔投資，𠵱家傾緊叫古仔同余文樂嚟客串，雖然戲入面有援交場面，又有三女全裸鏡頭，但我哋唔係拍少女成長陰暗面，最後係勵志嘅。」
撰文：馮仁昭
馮仁昭
from:
http://hk.apple.nextmedia.com/entertainment/art/20150205/19029346
