陳奕迅（Eason）、譚詠麟（阿倫）、李克勤、陳慧嫻、吳雨霏同關楚耀等一眾環球歌手，噚日齊集銅鑼灣為公司推出「UMC環球唱片會員卡」做見證。早前喺「MAMA頒獎禮」以一曲《浮誇》震懾全場嘅Eason，覺得好開心令到香港人有啲嘢自豪，佢仲爆料話揀呢首歌係逼出嚟：「起初同公司傾係唱《十年》同《碌卡》，因為《碌卡》舞步可以同韓星舞蹈比拚，但最後只可以唱一首，我就揀唱《浮誇》，自己睇返都覺得感動。我最希望全智賢因為睇呢個頒獎禮會睇到我唱呢首歌！」問Eason係咪鍾意對方？佢就變成小fans面紅話：「好啦，唔講啦。」
一大班環球歌手包括（左起）吳雨霏、李克勤、陳慧嫻等出席公司活動。
阿倫個唱加四場
阿倫農曆新年嘅紅館騷宣佈加多四場，見佢就勁風騷，仲即場為性格十三點嘅慧嫻起咗個稱號叫「環球十三姨」，搞到慧嫻鬼咁開心，阿倫仲話：「Eason就叫十三公，如果學友嚟埋就叫環球十三章。」此外，今年唔少歌手都表明缺席頒獎禮，克勤去唔去？佢話：「新城就去唔到，其他三個都唔喺香港。」咁即係唔去囉！
撰文：馮仁昭
馮仁昭
from:
http://hk.apple.nextmedia ... 141211/18964651
