亞視面對重重阻礙，就連能否續牌都是一個問號，卻仍是非頻繁，有指筱靖因為一句「出糧係天經地義」而被放入雪櫃，但據知真正死因是姚嘉雯、韓燕被揭零底薪換工作簽證，亞視因此被入境處調查，而筱靖當日被問回應，她重提7,000元人工一事，結果因此而被雪藏。
筱靖昨日接受電話訪問時被問到雪藏一事，她說：「噚日公司有人出嚟話冇呢件事，我唔知好嬲定好笑，口口聲聲叫我唔使返，休息嚇先，一個莫須有罪名，講出糧係天經地義，話我講7,000蚊呢單嘢，其實呢單嘢係兩年前我都講過，咁樣小題大做，我唔明錯喺邊囉？」
有報導指亞姐姚嘉雯（中）及韓燕（右）以零底薪換取亞視工作簽證。資料圖片
筱靖自爆收到通知不用出席亞生決賽。
被禁出席亞生決賽
維穩台要滅聲，亞視冇糧出，有不少藝人勇於發聲，結果筱靖成為出頭鳥，消息指有藝員得悉高層會秋後算賬，便急急找高層道歉賠罪。筱靖被問到有否向高層道歉認錯，她說：「我直頭唔知呢件事，我媽咪生日返咗去廣州，取消咗通告，冇人搵過我，我有常規節目又cut咗唔使我開，亞生決賽唔使我出席，又唔使我做亞姐評判，我先打電話返去瞭解，我有搵番啲新聞出嚟問佢哋，我錯咩呀？我冇講錯嘢喎！」
筱靖工作被煞停，除了前晚的司儀工作，因為是兩週前簽定及客戶指定。
「唔好揞住良心講話」
被滅聲的筱靖曾支持反佔中，今日她深明學生為何要站出來，她說：「呢件事上面我覺得係唔公平，公司咁耐以嚟叫我哋做良心員工，做個良心員工，唔好講揞住良心嘅說話。」無辜被雪，筱靖心有不甘，她忍不住連珠發炮：「喺亞視我冇多攞過佢一分錢，台慶買枱又好，叫我贊助餅呀！拉廣告呀！搵廣告客戶，我一定收到電話，我做曬所有嘢，幫埋亞姐搵纖體公司，𠵱家收到訊息係做十件好事抵唔過一件錯事。」幸好筱靖得到家人、朋友和同事支持，問到往後她有何打算？她說：「冇呀！其實我都仲有合約喺度，叫我休息嚇咪休息嚇，朋友行家都會搵我做騷，冇乜太大所謂！」
有關筱靖被雪一事，亞視公關發言人再次否認亞視雪藏筱靖，一切只屬正常的工作調動，不過亞視方面曾有高層向筱靖建議不要公開薪酬等資料。
採訪：舒娜
from:
http://hk.apple.nextmedia ... 141025/18911389
