來自韓國的佳麗Kim抵港後,要在機場呆等近兩小時。
亞視陷入財困,要「撲水」完成《亞洲小姐競選》這項一年一度的大型節目,但前日傳出外判保母被拖9及10月糧,所以要罷工抗爭。昨日四位海外佳麗來港未見有保母接機,最先到達的韓國佳麗在機場慌失失找接待人員,表現狼狽。
亞視只派出一位男職員(左)接機,未見有保母侍候兩位佳麗。
佳麗誤以為亞視安排豪華七人車接載,知擺烏龍後將行李放回殘Van。
印度佳麗(右)及老撾佳麗陸續抵港,準備22日參與亞姐總決賽。
上錯光鮮七人車
昨日近12時,韓國佳麗Kim Mink Yung由一名男士陪同抵港,等了十幾分鐘仍未見亞視職員,男友人不停打電話,Kim則表現慌張,買完水即衝入廁所避記者,後來有一名自稱是負責海外佳麗的亞視男職員現身,問是否有保母罷工?他口窒窒說:「冇呢件事,我唔係咁清楚,但相信好快冇事。」有沒有佳麗退選?他說:「我手頭上冇,佳麗都好想嚟參加比賽。」雖然見到接待人,但Kim仍要在機場呆等近兩小時,原來是要等馬來西亞佳麗Jacinda一同離開。
一行四人各自拖住行李步往停車場,現場有多輛七人車,陪同Kim的男士見到一輛豪華七人車打開車尾箱,即第一時間將行李搬上去。但後來發現擺烏龍,原來亞視安排了泊在豪華七人車旁邊的另一輛七人車,由於車身較殘舊,令亞姐感愕然,有司機忍不住口說:「嘩!呢排亞視拖糧,真係好cheap用咁嘅車,係都用新款啦。」佳麗面懵懵將行李搬回自己的車尾箱,上車後仍保持微笑,並向傳媒揮手道別。另印度和老撾佳麗於三時許抵港,獲另一名亞視職員及七人車接送離開。而亞視公關部昨回覆,表示已安排保母回公司取支票,盡快安排復工。
採訪:譚倩宜、嵐山
攝影:陳順禎
from:
http://hk.apple.nextmedia ... 141113/18932838