鄭欣宜噚日喺海洋公園搞咗個記者會,宣佈佢加盟星娛樂唱片公司,師姐關心妍仲神秘現身,力撐師妹!聽到師姐話大家係一家人,乜嘢情況都會保護,欣宜即刻好感動,喺台上兩個人仲即刻眼濕濕咁錫錫同抱抱㖭!不過欣宜見到啲鬼就鬼咁驚青,拎住張紙巾遮住塊面,仲話自己唔會拍驚慄片!
欣宜前排去咗海洋公園探企鵝,似乎佢都幾受企鵝歡迎!
開騷等陣先
入咗行6年嘅欣宜話希望可以做番自己,令更多觀眾鍾意同接受,佢仲話:「之前我好乖,公司叫我做乜就做乜,但係𠵱家要做番一個真實嘅我!」近期欣宜嘅身形都圓潤咗好多,但係佢話:「公司完全冇叫我減肥,我領略到無論點都唔會瘦得過人哋、靚得過人哋,但係做自己冇人會比我叻!」酬勞方面,欣宜話係一個開心嘅合作,不過講到幾時開演唱會,佢就話:「我唔敢同公司提出,出嚇歌先喇!」
欣宜喺台上仲扮企鵝,原來佢前排去咗海洋公園做義工,仲話個地方對佢好有回憶,佢話:「以前細個有同媽咪嚟,嗰陣我好大膽,好想試嚇玩過山車,但係唔夠高,就算喊曬媽咪都冇辦法!」
撰文:馮仁昭
from:
http://hk.apple.nextmedia ... 141022/18907670