亞視呢排真係新聞多多，唔單止傳出佢哋會賣盤易主，就連上個月嘅糧都未出，搞到員工同演員都好擔心，大家都好想知幾時有糧出？不過，亞視無錢出糧，但噚日就繼續使錢，噚日就喺海洋公園搞活動，23個候選亞姐同16個入圍亞洲先生，一行幾十人入去派糖畀遊客，剩係交通費都使唔少啦！活動上，即場宣佈入圍亞洲先生16號郭佳瑋攞到「最佳損友獎」，大會畀郭佳瑋揀其中一位候選亞姐頒獎，結果佢揀咗6號劉佩欣，仲可以錫對方臉珠仔兩啖，雖然劉佩欣個表情好唔願意，但事後佢死都唔認，只係話自己17歲，呢方面冇經驗，仲話初吻已經畀咗爹哋。
亞視雖然冇糧出，但昨日仍繼續安排亞生亞姐喺海洋公園搞活動。
韓非兒踎低搶鏡
9號韓非兒雖然冇俾郭佳瑋揀中，但都好識搵位搶鏡，大合照時現場有人扮嘩鬼在她身邊彈出，她即時嚇到腳軟踎低，最後仲要工作人員扶埋一邊休息，真係幾細膽喎！但事後問佢係咪好驚？佢就話只係嚇一嚇，冇乜事，仲讚演員好專業㖭！亞視噚日仲話本來有26個候選亞姐，𠵱家只有24個，有2個以身體問題為由退選，包括只有14歲的林曉，馮仁昭發現噚日得23個女仔出現，大會話18號佳麗簽證問題趕唔切嚟，比賽嗰日一定會出現。
撰文：馮仁昭
From:
http://hk.apple.nextmedia ... 141013/18897930
