亞視9月份嘅糧仲未出，噚日到咗最後限期嘅第7日，亞視助理副總裁冼偉智曾經否認拖糧，話係董事人士調動所以遲咗，又話會依足勞工法例喺7日內發薪，但係去到噚日6點鐘收工時間，都仲係未出糧。亞視員工仲未有糧出之際，亞視主要投資者王征呢幾日就印印腳嘆下午茶、坐遊艇出海、行街shopping，喺微博開心share，完全唔理班員工冇糧出嗌救命。
蔡國威話自己擔心第7日之後都冇糧出。
資料圖片
ATV再否認賣盤
亞視藝員蔡國威噚日返亞視幫亞姐宣傳配音，見到班同事，你眼望我眼，都係問同一個問題「幾時出糧呀？」威仔喺電話入面話：「我自己check過都發現今日仲未有出糧囉！」係咪好擔心呀？佢話：「其實一個打工仔梗係擔心喇！每一個月好辛勤咁去工作，當然梗係希望準時出糧！」辛勤嘅小蜜蜂威仔講到公司嘅情況，佢話：「今日都有返公司見到有好多同事，好專心咁緊守崗位，不過大家都有問一個問題，就係幾時出糧！」另外，有自稱係幾個亞視員工嘅朋友溫先生代一班朋友出頭，佢指亞視今日都未出糧，據知亦有亞視員工已經急到打電話去勞工處熱線求助，準備今日去勞工處。
就出糧問題，亞視公關部答案始終如一：「公司人事變動，安排緊，希望盡快解決。」
亞視有人事變動，近日傳出亞視賣盤，楊受成是金主一事，亞視公關部表示未聞此事。
撰文：馮仁昭
From:
http://hk.apple.nextmedia ... 141008/18892710
