本報前日獨家報導11年港姐亞軍朱希敏，上月與男友、07年落選港男李善恆甜蜜拍拖原來只是假象，李善恆其實早已背她偷嗒巨乳長髮女，日前更與小三手拖手，甜蜜遊走銅鑼灣兼撐枱腳食快餐，完全當朱希敏冇到。
男友「偷食」斷正，本來對男友信心十足的朱希敏，不得不面對殘酷現實，經過一日一夜整理思緒，昨日八號風球高高掛的凌晨2時，她在微博宣佈分手消息。朱希敏在微博寫道：「收到好多朋友的問候，很感激難過時有一班好友支持，我現在一切都好，心情已平復，過程是美好的，結局是失望的，但人生豈會盡如人意？唯一遺憾的是離開沒有講再見，而那個她又是誰人呢？動搖了我們三年的感情，最後送上一句『祝福你們。』」
李善恆偷嗒巨乳女（圖）後失蹤，完全無意致電女友朱希敏解釋。
資料圖片
朱希敏表示不會跟李善恆復合，因最憎人沒有誠信。資料圖片
朱希敏昨日凌晨在微博宣佈與男友分手。
「佢冇挽救嘅意思」
昨日本報致電朱希敏瞭解其心情，她說：「其實都喺微博度寫咗，新聞出咗後佢（李善恆）無搵過我，所以大家完全冇深入傾過，不過相信佢都冇挽救嘅意思。」那麼如果李善恆要求復合，又可會原諒對方？朱希敏堅決表示不會，她說：「我一向最著重互相信任，既然無咗呢樣嘢咁就冇必要一齊喇！其實到𠵱家我都唔知發生乜事，亦都唔知嗰個人係邊個，但過咗去都唔再提喇！」
三年感情就此結束，朱希敏承認感到可惜，不少朋友都致電慰問她，但她指自己在適當時候會變得堅強，她又表示：「其實回想之前都有察覺（李善恆）有啲怪，會成日行開㩒電話，但係估唔到畀你哋快過我發現。」而背女友偷食的李善恆，其手提電話昨日則一直未能接通，亦沒有回覆短訊。
採訪：小米
from:
http://hk.apple.nextmedia.com/entertainment/art/20140917/18868291
