上期剛介紹完非國產的平價手機，短短幾日後又出多一部，仲要由台灣品牌ASUS推出，以貼近國產機價錢，大玩低光影相同4G制式為賣點，講到明要擊敗小米的平價手機。對擔心國產機不夠安全的用家來講，當然是好事。
交足功課
原裝有白、黑、紅三色，不過底殼可以拆，有新殼就可以隨時轉色。
先講主打的影相功能，ZenFone 5 LTE配備F2.0大光圈，再加上自家的PixelMaster，聲稱可在夜間或低光環境，提升四倍感光力。實際試拍，夜攝能力未至於太強，同iPhone 5c相比，雜訊依然頗多，但如果只計同級機，質素已算相當不錯。屏幕雖然只得720p解像度，但流暢度都頗高，未有明顯殘影，只是顏色有些微偏淡，黑位不夠實淨。用機方面，今次用2GB RAM版本測試，手機雖然配備中低階機常用的1.2GHz四核心處理器，但表現尚算流暢，睇高清片或打機都應付自如；再試開多幾個apps，先至有少少窒機。值得一提是電量方面，正常用了半日，只用了三分一電，都幾襟用。整體來講，ZenFone 5 LTE絕對是一部抵玩的4G手機，雖然另外還有1GB RAM 8GB內存（$1,399）及2GB RAM 8GB內存（$1,599）版本，但價錢最多只相差三百元，為免用落窒機或不夠空間裝apps，建議都是買最高規格版本穩陣。
試相於光源不足環境下拍攝，兩部機影出來都有頗多雜訊，但ZenFone 5 LTE明顯較多，而且亦有偏色問題。
iPhone 5c
ZenFone 5 LTE
裝「安兔兔」跑分app評測，分數未算突出，但就稍稍贏過ASUS的假想敵紅米。
規格
雖然可拆蓋，但打開後只得SIM卡及記憶卡插槽，電池就不可更換。
作業系統：Android 4.4網絡：LTE、HSDPA、四頻處理器：Qualcomm Snapdragon 400 1.2GHz四核心屏幕：5吋1280×720解像度LCD相機像素：200萬（前）/ 800萬（後）記憶體：2GB RAM/ 16GB ROM/支援microSDHC（最高128GB）通話/備用時間：未有提供體積/重量：148.2/ 72.8/ 10.3mm/ 145g（iPhone 5s重112g）售價：$1,699網址：
http://www.asus.com
text：周群雄 photo：陳健邦
