哈囉喂又黎喇！今年以「哈囉喂鬼界大影城」為主題，由羅蘭姐聯同夏蕙BB盧海鵬化身嘩鬼，旗下一眾妖魔鬼怪將藏身７間鬼屋：「神話森林」（夜晚為「森林慌塚」）、「星魅製片廠」（夜晚為「奧屍卡製片廠」）、「多啦Ａ夢哈囉喂派對」、「殭屍IVE」、「萬壽終醫館」、「東瀛魔界遊」、限制級的「H14」，隨時嚇破你膽！
今年首度推出限制級鬼屋，未夠16歲無得玩！必須預先網上預約，參加者要在上鎖的密室完成一連串體驗任務。為追求刺激，哈囉喂團隊將為每組參加者度身訂造驚嚇體驗，並根據參加者於行重中的反應調整旅程和驚嚇元素。首輪網上預約將於8 月29日、9 月3 和5日開放，歡迎膽生毛的你挑機。其中一間鬼屋將以公共屋邨為背景，重現麥浚龍執導《殭屍》中的驚嚇場面，打造屬於香港人的鬼屋。
除了驚嚇程度破表的鬼屋外，海洋公園亦加入輕鬆可愛元素，推出以多啦Ａ夢為主題的「多啦Ａ夢哈囉喂派對」。由多啦Ａ夢以時光機和隨意門等法寶為你掀開萬聖節童真的一面。
今年亦會承接上年推出的「全日祭」，由10 月起16個特選日子憑日間門票就可以由朝十玩到晚十一。如果想玩但又怕排隊，可以哈囉喂預約通行證預約最多5 間鬼屋（「殭屍IVE」、「萬壽終醫館」、「東瀛魔界遊」、「神話森林」和「森林慌塚」），並可與最多4 位朋友一齊SHARE！
10月挑戰你膽量既時候！
