梁健平捱足28年終吐氣揚眉，憑首次擔正的短片《三輪車伕》，角逐多倫多影展最佳短篇電影，下一站更會進軍康城影展。
在電視圈捱足28年的綠葉王梁健平，觀眾認得樣，但未必叫得出他的名字。梁健平現為港視藝員，卻因港視不獲發免費電視牌，令他前路茫茫。幸好給他趕上尾班車，主演短片《三輪車伕》擔正人生第一個男主角，角逐多倫多影展最佳短篇電影，下一站更準備參戰康城，進軍國際！縱使將來不能名成利就，梁健平亦早有打算：「我揸車洗碗都得，唔係做演員就身份尊貴。」
現年54歲的梁健平，最近因為衝出香港，客串演出韓劇《命中注定我愛你》而備受注目，加上他處男下海擔正做男主角的18分鐘短片《三輪車伕》（Tricycle Thief），近日被指在多倫多國際電影節奪得最佳短篇電影，網民為他高興得熱烈彈琴熱烈地唱，連廖啟智也發短訊恭賀，一時間令梁健平人氣急升。
要成名發放正能量
不過，梁健平日前接受本報專訪先來個澄清：「一個美麗嘅誤會，其實我哋只係喺幾百條片入咗圍裡面嗰幾條，未攞獎，我好希望導演可以得到獎，佢好畀心機。聽聞部戲有機會變一部正式電影，導演Maxim Bessmertny話預咗我一份。」除入圍多倫多影展，梁健平聞得短片還會報名參加康城及其他國際影展，一於向世界出發。
能夠接演韓劇及《三輪車伕》，梁健平感激港視經理人一番努力，並形容：「我係絕對好彩。」雖然一下子由寂寂無聞變成有人講得出自己名字，梁健平坦言還未覺得自己吐氣揚眉，身為基督徒的他說：「我只係畀心機去做，每一次演出都當係最後一次演出，令自己更加投入同努力。唔理係主角好、配角好，就算路人甲我都好認真去做，呢個就係我工作態度。最緊要有工開。我想自己再出名啲，因為出名就可以幫呢個社會做多啲嘢，有感染力令到好多人聚埋一齊為社會做多啲好事，將更多愛同歡樂帶畀人。」
去年梁健平到澳門拍攝由英國導演執導的短片《三輪車伕》，成為他人生轉捩點。
進軍康城是不少演藝人的夢想，綠葉王梁健平當然也不例外。
無線捱到五勞七傷
在無線的日子，梁健平吃過不少苦頭，連踩幾十粒鍾不眠不休打風落雨照開工已是「基本動作」，又試過拍古裝劇被武器打傷額頭，又腫又瘀繼續開工連戲，惟有將頭套拉到落眼眉遮掩。
經常被派演路人甲的他，最深刻一次是文戲臨時變成動作戲，梁健平說：「本來係傾偈，導演忽然叫我凌空抽起背脊落地，話覺得咁樣好睇好多，我咪去拍囉。地下冇墊，我拍咗兩次，第一次因為cameraman個位唔準，導演冇交代畀佢聽個位係點，跟住我第二次落地，背脊唔知邊度『嘞』咗一聲，好痛，收工返屋企係咁捽藥酒。最後場戲係剪走咗，聽聞因為同我做戲個男演員啲戲麻麻，出嚟啲戲我搶過佢。」
梁健平客串張赫孭飛韓劇《命中注定我愛你》，全多得其經理人Angel促成。
儲錢供兩女讀大學
當日梁健平在無線以每月近二萬蚊人工撐起頭家，前年王維基的香港電視網絡高薪挖角，梁健平決定離開博一博，他說：「港視人工比無線高一倍以上，我兩個女大，一個14歲，下月中四；一個16歲，下月中五，我好需要一份穩定收入嚟供兩個女上大學，呢個係最大誘因。無線一樣有好多演出機會，但港視真係畀到一個好好價錢，希望呢幾年儲到嚿錢，畀兩個女讀大學，我心願係咁啫。」
港視不獲發免費電視牌照，梁健平固然徬徨，但未至絕望，他說：「我同港視仲有半年先約滿，人冇絕望，我哋永遠都有希望，唔做藝員咪做第二份工，我揸車洗碗都得，唔係做演員身份就尊貴，掃地洗碗都係有尊嚴嘅職業。當年拍《隨時候命》我做直升機師，我就諗會唔做揸貨櫃車揸van仔，嗰年我除咗的士牌之外，考曬所有營業司機執照，重型貨車、巴士、小巴，第日公司真係委派我做咁嘅角色，我就隨時候命可以做到。冇嘢做我咪揸車囉，有乜所謂，唔通揸車過唔到日子咩？好多司機都係揸車養家，職業無分貴賤。」
港視近日找李心潔拍攝的網劇《風雲》，梁健平也有份演出，據悉他正是扮演特首梁振英，對此梁健平只說：「我只可以透露做全港最大嘅人。」
採訪：戴彩煥
【Profile】梁健平（54歲）
入行經過：
86年加入無線拍《城市故事》，前年離巢，現為港視藝員。
擅長角色：
辦公室同事、高級職員、西裝友等。
出位作品：
《棟篤神探》飾演阿平，與雪妮合演情侶。
from:
http://hk.apple.nextmedia ... 140818/18835355
