馬賽去年使橫手做小三，介入內地富婆Laura Lee同女製片汪子琦嘅斷背情，最後三敗俱傷，汪子琦同馬賽分手後，發微博向Laura道歉，大前晚汪子琦同Laura分別喺微博晒飯局相，原來呢晚佢哋喺上海約咗劉玉翠、翁虹同謝天華嘆日本菜。
不過，汪子琦同Laura都冇擺兩人合照，似乎想將件事低調處理，但醒目嘅網友已睇出蛛絲馬迹，留言：「復合了，太好！」點知咁啱馬賽前晚又蒲頭，着白色裙扮「純純兔」出席慧妍活動，冧掂朱玲玲老公羅康瑞買咗成叠獎券。噚日Laura睇咗新聞，朝早喺微博留言暗寸馬賽係白切雞：「這幾天已經好食好玩，誰料媒體還關懷，附送了一碟『白切雞』加料！」認真抵死！
汪子琦同舊愛Laura（右圖）分別喺微博晒同劉玉翠嘅上海飯局相，惹來復合之嫌。
一齊遊上海
噚日馮仁昭問Laura係咪同汪子琦復合？佢透過微信否認：「唔係，我哋好耐冇見，嗰日喺上海玩幾日，啱啱好翁虹同謝天華都喺上海，叫咗佢一齊出嚟食飯，咁啱得咁蹺食餐飯。」至於暗寸馬賽係白切雞，Laura笑住話：「朋友cap咗蘋果張相我睇，覺得真係好似白切雞喺中間嘛。」
from:
http://hk.apple.nextmedia ... 140519/18724596
