被形容為「全城最索千金」嘅賭王三房女何超蓮，舊年喺英國倫敦大學經濟系以一級榮譽成績畢業後，原本計劃留喺英國嘅會計師行實習，但為咗方便屋企人仲有同男友吳克羣見面，於是同公司申請去駐北京分部做嘢，慳番啲搭飛機時間。
上星期二（五月六日），《壹》仔喺中環ifc見到零妝打扮casual嘅超蓮同個朋友喺Lane Crawford買完內衣褲再睇鞋，之後去超市買埋麵包先走人。
見到《壹》仔跟住，一滴妝都冇嘅超蓮好唔情願：「我冇化妝，唔好影啦！」問佢唔使返工？超蓮自動報料：「本來要飛去北京，但整親條腰，要睇醫生所以改期，不過已經冇乜嘢！唔好影啦，我對腳咁肥。」
實在欲罷不能！大家睇相，超蓮點只對腳見得人，仲有超短褲下嘅股惑，《壹》仔隻手，不受控喎！
整傷腰嘅超蓮著平底鞋襯超熱褲，側面後面睇，都誘惑。
校啱時間走人，媽咪三太已經坐喺車上等。
素顏超蓮同化晒妝嘅朋友行完Lane Crawford再去超市，零妝上鏡，23歲超蓮下意識遮遮掩掩。
撰文︰八珍
