英超球季鬥到最後一刻，利物浦和曼城相差只有兩分，還需看最後一場方知哪隊奪冠。「動燈女神」董嘉儀（大埔LuLu）日前親到黃大仙求籤，籤文似乎傾向曼城，不過利迷稍安無躁，因為波係圓嘅。
曼城爭標秤先（英超明晚揭盅）
背景：利物浦今屆表現脫胎換骨，理應奪得首個英超錦標，可惜除了明晚煞科戰主場必須擊敗紐卡素外，還要寄望曼城全失三分，機會渺茫。有「燈神」之稱的LuLu，每逢穿上任何一隊波衫影相擺上fb，該隊都「凶多吉少」，暗撐利記的LuLu明晚就會穿上曼城球衣，隨時成為曼城失冠的不安因素。值得一提是，利記求得第八十九籤，89-90年正是利記最後一次在頂級聯賽奪冠的球季，可謂認真邪門！
曼城奪標：
第五十九籤（下下）東施效顰
解籤：東施原本係平凡女子，但有實力；西施只不過係美女啫。從中意境係話，叫呢隊伍珍惜利用人才，自立風格就更有成效。
利物浦奪標：
第八十九籤（下下）季札掛劍
解籤：運程欠佳，際遇唔係咁理想，貴人有機會離開（莫非蘇亞雷斯？），大家要平復心態，繼續努力啦！（即係下年嚟過啦！）
阿仙奴苦盡甘來（足總盃5月17日分曉）
背景：阿仙奴連續九年鬧「冠軍荒」，無論領隊雲加抑或阿記一眾球員，都慘成被恥笑對象，足總盃歷盡艱辛殺入決賽，將迎戰秤低一線的侯城，究竟阿記（應該係雲加）能否一吐烏氣，9年來首嘗捧盃滋味？
阿仙奴捧盃：第三十四籤（中吉）大舜耕田
解籤：大舜孝順感動上天派神象幫佢，長輩得力。係好辛苦，有時有人睇唔起佢，但千祈唔好嬲，總會苦盡甘來。
巴塞年輕助力（西甲5月18日分曉）
背景：西甲聯賽只得三隊有望爭標，分別是巴塞隆拿、皇家馬德里及馬體會。巴塞要聯賽衞冕，必須在餘下兩場賽事勝出，最後一場對馬體會更加係關鍵。
巴塞奪標：第七十八籤（上吉）曾點論志
解籤：呢支籤唔係話差，最好春天打波（可惜已過）。青年人力量幾好，扶助青年就必定成功。（出奇兵？）
皇馬有望登基（歐聯5月24日分曉）
背景：兩支西甲球隊皇家馬德里和馬體會殺入決賽，論實力兩支勁旅旗鼓相當，但論明星效應，當然是擁有C朗、加里夫巴利等大牌球星的皇馬較多人捧場啦！
皇馬捧盃：第二十五籤（上吉）朱洪武登基
解籤：朱洪武窮到食泥雞，但係打勝仗，所以勇往直前就有機會。畀啲信心，要打得好狠㗎！
from:
http://hk.apple.nextmedia ... 140510/18715079
