許曉晴（Sunny）公開大學社會科學系Yr.4男仔頭性格的Sunny非常獨立，很快適應香港的生活，「我試過打3份工，經營網店、補習同侍應，仲覺得一日24小時唔夠用，自己揀嘅路，跪喺度都要行落去，唔會埋怨！」
現在走入香港校園，隨時聽人講普通話多過廣東話，除了三大被內地生迫爆外，連公大、樹仁都不乏內地生，你有你趕蝗，實情係大把內地同學恨在港留學，甚至拎埋身份證在港落地生根。
22歲的許曉晴（Sunny）來港四年，在公大讀書只為港人身份，她說：「過多三年就可以拎香港身份證，冇咗內地戶籍都冇損失！住劏房我都ok，反正嚟香港唔係為歎世界。」
點解嚟香港讀書？
就讀公大的Sunny沒有介意學校不是一流大學，「我今個月拎咗公大獎學金，英雄莫問出處，做事智商同情商都好緊要，唔一定讀出名大學先會成功，我願意從基本做起，虛心學習都可以成功！」
我四年前由廣州嚟香港，屋企人好清楚香港嘅法治、政制、公平民主各方面都比內地好，因為爸爸喺內地做政府官員，深明公平法治社會有幾重要，所以佢好鼓勵我拎香港戶籍，即使我內地高考成績夠入廣州二線頭嘅大學，按理華南師範或者廣州大學都穩入嘅，但我寧願揀讀香港嘅公開大學！𠵱家喺公開大學讀社會科學，過多幾個月畢業，前路未明，但都好過留喺內地，淨係言論自由已經爭好遠，喺內地上課永遠只有老師講，你就聽，好少有發表自己意見嘅機會，而且內地學生喺課堂好少傾時事政治，都係按書本嘅框框學習，好少激發思維，唔似得香港有通識讀。
準備租劏房住？啱啱嚟嗰幾個月覺得自己格格不入，英文又跟唔上，上堂好大壓力，夜晚狂喊，每到週末都跑返廣州屋企，喺呢度讀書嘅委屈唔想講畀屋企人知，因為屋企人一直以來因為我考到香港嘅大學而自豪，所以我點都頂硬上。
不過房屋問題先最煩，我喺廣州間屋係兩層複式，有2千呎，𠵱家同五個同學喺土瓜灣合租一個單位，我又覺得冇咩大不了，住劏房我都ok，反正嚟香港唔係為歎世界，唔使租咁貴咁大，過嚟都係為賺錢為將來，希望搵到錢，夠我買車買樓啦！香港生活同原本內地生活質素嘅差距我預咗，不過當我返到內地屋企難免忍唔住感嘆「這才是家」。
試過同港仔拍拖？我識好多港男講嘢都冇重點，踢一腳先郁，一係得個講字，做就另一回事，喺香港四年試過一次同港男拍拖，只係拍咗三個月，史上最短時間，佢太幼稚又貪玩又冇上進心，好似姐姐帶小朋友出街，我頂唔順，我鍾意啲成熟型嘅男人，最好好似《爸爸去哪兒》個張亮咁，又成熟又顧家先啱我！
阿爸做官Sunny的爸爸（前左一）是內地官員，家住二千呎大宅，難怪初來港完全不習慣居住環境。
雖然Sunny（紅圈）來自內地，但與同學相處融洽，「我係廣州人，都係講廣東話，有啲同學一開始都冇發現我係內地生，所以冇試過俾人歧視。」
U花U草：
只要是各大專界的靚仔靚女，《FACE》就會介紹給大家認識。
化妝：Kika Wong
