亞洲電視經常被人批評甚少自家製作節目，最近似乎有「復活」的迹象，早前宣佈將會翻拍經典電視劇，更會製作綜藝節目，最近更密鑼緊鼓炮製一個從籌備生B、懷孕到入讀幼稚園的《BB日記》，並找來封咪沒出碟多年的劉小慧擔任主持。
本身是兩女之母的劉小慧，今次復出主持BB節目，將會分享照顧小朋友心得。
廣告商歡迎
據聞今次這節目十分受廣告商歡迎，籌備之初已獲不少贊助，亞視更有意開拍第二輯，這情況在亞視來說，認真罕見。昨日劉小慧在電話中說：「主持係第一次做，咁多年都冇試過，今次係因為呢個節目有新意，好少節目係單一講啲關於小朋友嘅事，所以你問我其實係開心㗎，又唔會有壓力，我好鍾意做啲自己從來都未做過嘅事。」
節目內容除了會有專家分析一些生活個案，又會與觀眾玩遊戲送禮物，還會有真人騷環節，觀眾可以提交有趣的影片，禮物也很大手筆，包括馬爾代夫直航機票、新西蘭入口的奶粉、尿片和金菠蘿。記者笑小慧今次身負重任，為亞視省靚招牌，她笑說：「唔好咁講，只係為咗做好件事，只要大家鍾意個節目，有口碑已經足夠，可以打破過往收視更加好。如果開到唔介意繼續做，我都希望成件事令大家有共鳴。」
陳啟泰稍後回巢與亞視作一次性合作。
陳啟泰回巢
小慧又說：「其實好多幕後都有心做，有競爭永遠都係好，冇理由得一台獨大，咁就唔好玩，乜嘢比賽都唔會係單人比賽，起碼有二、三個以上，有得鬥先有進步。」至於酬勞，小慧坦言只是友情價，希望可以有更多資源做好件事。據悉亞視在下月1日將在九展舉行一個簽約記者會，兼舉行有150個BB參加的BB爬行大賽。
另外，亞視前一哥陳啟泰也將回巢擔任感動香港司儀一職，今次屬一次性合作，聽聞酬勞不俗，陳啟泰昨在電話中承認說：「𠵱家我希望可以同唔同嘅公司合作，呢個係我夢寐以求嘅工作模式。」
from:
http://hk.apple.nextmedia ... 131128/18526894
