無綫為建立公信形象，𠵱家乜嘢選舉都玩民選，包括港姐、台慶視帝視后、《星夢傳奇》等，呢個熱潮仲吹到去馬來西亞。被喻為TVB《萬千星輝頒獎典禮》前哨戰嘅《TVB馬來西亞星光薈萃頒獎典禮》將於12月1日舉行，首次由TVB娛樂新聞台主辦，今年更公開畀馬來西亞全民投選，話想藉此回饋粉絲支持。
噚日無綫公佈入圍名單，共設13個獎，最矚目當然係「最喜愛TVB男/女主角」，各有12個藝人入圍，可以話人人有份，永不落空。被視為今屆視后大熱嘅鍾嘉欣憑《巨輪》角逐，不過有網民唔多睇好嘉欣BB，因為今次冇乜機會畀佢施展最耍家嘅喊功，有啲輸蝕。反而有人睇好上年敗於楊怡手上嘅徐子珊，覺得佢喺《神鎗狙擊》扮演外剛內柔嘅不死女警，好多有轉折嘅內心戲演得唔錯；而楊怡嘅《On Call36小時II》，雖然套劇未出街，但以佢上輯表現，演技不容忽視。而被讚憑《神探高倫布》演技大躍進嘅唐詩詠，唔知係咪人氣唔夠，只入圍「最喜愛TVB電視角色」。
鍾嘉欣入圍馬來西亞頒獎禮最喜愛TVB女主角，不過俾網民批評演技冇突破。蕭正楠同鍾嘉欣雙雙憑《巨輪》，分別獲提名最喜愛TVB男、女主角。
徐子珊喺《神鎗狙擊》演嘅不死女警俾網民讚有演技。劇照
張智霖已經度定檔期出席香港同大馬嘅頒獎禮。
Cool魔勝算在握
徐子珊噚日喺電話度話：「唔係呀嘛？咪玩我喇，我舊年畀太大壓力自己喇，所以我今年會隨緣，好好享受個過程，到時睇公司安排。」
男主角似乎係《衝上雲霄II》天下，吳鎮宇、Cool魔張智霖（Chilam）同吳卓羲都入圍，而陳豪同黎耀祥就憑《法外風雲》入圍，部劇冇乜noise，陪跑居多；拍到入院嘅歐陽震華冇份，令人有啲意外。Chilam前晚喺尖沙嘴出席活動，有傳佢揮抵陳豪攞視帝，佢笑晒口話：「當年《十月初五的月光》嘅初哥哥都俾人睇好，但最終冇獎，今次都冇諗。自己平常心面對，有就錦上添花。」問佢恨唔恨？佢話：「唔好咁講，啲人會話我高傲。」不過佢就話會抽時間去晒馬來西亞同香港嘅頒獎禮，似乎胸有成竹。
版主：陳基征
from:
http://hk.apple.nextmedia ... 131031/18486415
