陳小春同陳冠希有咩共通點？除咗都係姓陳，同都係曾經同張栢芝拍過拖外。佢哋兩個都曾被封「韋小寶」。當然陳小春就係拍劇時被封，而陳冠希就被網民封嘅「現代版韋小寶」！
可能「韋小寶」喺內地好受歡迎啦。繼早前有人喺內地長沙火車站，用「韋小寶」嘅假身份證之後，被捉到。大前日又有內地男子用假證喇！今次被冒認嘅對象就係陳冠希。有一位內地男子，喺合肥搭火車時被查身份證，竟然遞咗張「陳冠希」版嘅假證俾個民警，民警一攞張證上手，就覺得有問題，睇一睇張證上面嘅資料同相片，竟然都係陳冠希，地址仲要寫喺加拿大溫哥華添！民警即時就將張「陳冠希」版假證沒收，嚇到嗰個內地男子即刻攞返張真身份證出嚟，仲話張「陳冠希」版身份證係一時貪玩買返嚟嘅。
咁多嘢唔玩，人哋嘅身份證明文件都攞嚟玩。身份證事關法律，奉勸各位，就算真係想變成自己偶像，都唔好走去買呢啲假身份證，被人捉到，犯法㗎！
from:
http://hk.apple.nextmedia ... 131026/18480681
