林峯同吳千語愛到難捨難離，真係見少一秒都空虛！前日佢哋兩個又出動，仲沿途打情罵俏旁若無人。約下晝4點鐘，峯峯開住佢部過百萬嘅瑪莎拉蒂跑車，載住千語BB去金鐘行街，峯峯將架車開落金鐘停車場，跟住交咗架車畀汽車護理中心扮靚，佢同千語BB就上咗樓上商場行街。兩個人都戴住墨鏡，上身都係黃色衫，簡直襯到絕。
撞膊撒嬌
女人行街自然離不開買嘢，千語BB當然唔例外，佢好快就買咗袋戰利品，交咗畀男友峯峯攞住，又搭住佢膊頭行。其間千語不時玩電話，峯峯好有耐性咁陪佢行。行咗大概半個鐘有多，峯峯同千語去咗商場一間專賣三文治同沙律嘅餐廳叫外賣，佢哋一邊睇一邊商量要乜嘢配菜，而因為佢哋副太陽眼鏡太黑，揀到最後佢哋都要除咗副眼鏡至望得清楚啲食物。
經過五分鐘精挑細選，等攞外賣嘅時候，峯峯同千語BB開始打情罵俏有講有笑，千語仲不時用膊頭輕撞峯峯膊頭，峯峯稍後亦還以顏色，摸女友頭又揑佢後頸，搞到佢痠軟到要蹲低，感覺好似初戀嘅情侶。
【血拼搭膊頭】
林峯同吳千語前日拍拖逛商場，唔止件衫同墨鏡襯到絕，連行路姿勢都一樣！DV圖片
【揸瑪莎拉蒂】
撻唔着車
攞完外賣，峯峯同千語行返落停車場攞車，準備返屋企撐枱腳，不過峯峯第一次撻車時撻唔着，要護理中心嘅師傅指導至搞掂。當記者問到佢買乜嘢？峯峯就話：「專訪我先答問題㗎，唔好意思。」有禮貌得嚟又幾冇厘頭喎！
from:
http://hk.apple.nextmedia ... 131014/18462427
